Сёння ў Вярхоўным судзе Беларусі пачаўся працэс па справе ваўкавыскіх прадпрымальнікаў Мікалая Аўтуховіча і Уладзіміра Асіпенкі.

12:15

Суддзя абвясціў перапынак да 16 сакавіка (аўторак). Працэс адновіцца а 10-й гадзіне раніцы.

Было задаволена хадайніцтва Аўтуховіча аб дадатковым азнаямленні з матэрыяламі справамі, але што да капіравання матэрыялаў, то суддзя заявіў "па магчымасці".

Хадайніцтва аб прыцягненні Камароўскага і Воўчака ў якасці абаронцаў адхілена. Суддзя заявіў, што сённяшнія абаронцы Аўтуховіча і Асіпенкі дастаткова кваліфікаваныя адвакаты.

Таксама будзе накіраваны запыт у пракуратуру наконт прамоцнасці дзеянняў супрацоўнікаў упраўлення па барацьбе з арганізаванай злачыннасцю.

11:27

Аўтуховіч і Асіпенка ў залі суда.

Мікалай Аўтуховіч.

Пацярпелыя. Намеснік міністра па падатках і зборах Васіль Камянко (справа).

Афганцы Воўчак і Камароўскі.

Аляксандр Ларын.

Шмат людзей ня здолелі патрапіць у залю суда з-за адсутнасці вольных месцаў.

Абвешчаны перапынак, суддзя разглядае хадайніцтвы.

11:15

Мікалай Аўтуховіч заявіў аб запалохваннях, псіхалагічным ціску на яго падчас следства. Казаў, што Лявонаву і Асіпенку прапаноўвалі даваць паказанні супраць яго, узамен абяцалі свабоду. Так, Лявонаву, па словах Аўтуховіча, казалі, што калі ён не дасць паказанняў, то яго "зачыняць на вялікі тэрмін". А Асіпенку, калі дасць паказанні, адпусцяць на вяселле дачкі, сказаў Аўтуховіч.

Мікалай Аўтуховіч таксама заявіў, што па справе былі затрыманыя каля дзясятка чалавек,

а азнаямленне з матэрыяламі следства праходзіла ў нялюдскіх умовах, пры тэмпературы 0 градусаў.

М. Аўтуховіч кажа, што нават адвакаты сядзелі ў куртках.

Падчас расследавання гэтай справы праз турму прайшло больш за дзесяць чалавек. На ўсіх іх, па словах Аўтуховіча, аказваўся псіхалагічны ціск.

Цяпер Аўтуховіч заявіў хадайніцтва, каб яму былі выдадзеныя копіі матэрыялаў справы для дадатковага азнаямлення, а таксама, каб працэс быў разгледжаны у Мінскім гарадскім судзе ці Гродзенскім абласным, каб была магчымасць абскардзіць рашэнне.

Заявіў аб удзеле ў справе ў якасці абаронцаў Аляксандра Камароўскага і Алега Воўчака.

Аляксандр Ларын - сам ён з горада Нальчык - сядзіць у кепцы. 1973 года нараджэння. Жанаты, двое дзяцей. Судзімы ў Расіі за крадзяжы. Асуджаны быў на пяць гадоў з адтэрміноўкай на тры гады. Затрыманы быў раней за Аўтуховіча 31 студзеня 2009 года.

***

10:17

Пачаўся суд. Пасяджэнне вядзе суддзя Аляксей Цяцюхін, пракурор - Сафараў. Відэа- і фотаздымку забаранілі, бо супраць выказаўся адзін з падсудных - Аляксандр Ларын.

9:59

З'явіліся двое пацярпелых - гэта міліцыянеры Кацуба і Мандзік. Залю ахоўваюць сем міліцыянераў у залі і два спецназаўцы. Сама судовая зала разлічана на 50 чалавек.

9:52

У залі пасяджэнняў 30-40 чалавек, прыйшлі генерал Валерый Фралоў, праваабаронца Алег Воўчак, Эніра Браніцкая, Сяргей Парсюкевіч, грамадскі дзеяч Вячаслаў Сіўчык, Павел Севярынец ды інш.

На лаве падсудных Мікалай Аўтуховіч, Уладзімір Асіпенка, а таксама Аляксандр Ларын і Міхаіл Казлоў, якія таксама праходзіць па справе.

Фотажурналістам пакуль дазваляюць здымаць. У залі прысутнічаюць журналісты дзяржых СМІ -- СТВ, БТ, БЕЛТА. А таксама прадстаўнікі АБСЕ.

***

Працэс пачнецца ў 10.00 у адкрытым рэжыме, аднак калі адзін з бакоў заявіць хадайніцтва аб правядзенні пасяджэння ў закрытым рэжыме, суддзя можа яго задаволіць.

***

Ваўкавыскія прадпрымальнікі Мікалай Аўтуховіч, Юрый Лявонаў і Уладзімір Асіпенка былі затрыманы 8 лютага 2009 года.

Праз 10 дзён ім прад’явілі абвінавачанне па арт. 218 Крымінальнага кодэкса (наўмыснае знішчэнне альбо пашкоджанне маёмасці).

20 лістапада Асіпенку і Аўтуховічу было прад’яўлена абвінавачанне ў падрыхтоўцы тэрарыстычнага акта.

Лявонава ў пачатку жніўня вызвалілі з‑пад варты, а 24 верасня з яго былі зняты ўсе абвінавачанні.

У студзені 2010 года міжнародная праваабарончая арганізацыя Human Rights Watch прызнала, што ваўкавыскія прадпрымальнікі былі арыштаваны па палітычна матываваных справах.

Беларускія праваабаронцы звяртаюць увагу на тое, што раней Аўтуховіч і Лявонаў ужо былі судзімыя і прызнаныя міжнароднай супольнасцю вязнямі сумлення.

6 студзеня, прадстаўляючы журналістам у Мінску хроніку парушэнняў правоў чалавека ў 2009 годзе, кіраўнік арганізацыі «Праваабарончы альянс» (Літва) Людміла Гразнова назвала Аўтуховіча і Асіпенку «сімвалічнымі ахвярамі» беларускай улады.

Паводле яе слоў, традыцыйна ў Беларусі застаюцца два‑тры зняволеныя па палітычных матывах, якія або знаходзяцца працяглы час у следчым ізалятары, або адбываюць тэрмін зняволення ў калоніі.

«Калі раней такія людзі адназначна арыштоўваліся па «палітычных» артыкулах Крымінальнага кодэкса, то цяпер назіраецца некаторая «мімікрыя»: улады гавораць аб тым, што Аўтуховіч і Асіпенка сядзяць за падрыхтоўку тэрарыстычнага акта ў дачыненні да старшыні Гродзенскага аблвыканкама Уладзіміра Саўчанкі і намесніка міністра па падатках і зборах Васіля Каменкі. Тым не менш праваабаронцы лічаць іх палітычнымі зняволенымі», — падкрэсліла Гразнова.

Яна лічыць, што гэта «павучальныя арышты і сімвалічныя ахвяры, якія ўлада прыносіць штогод для таго, каб грамадзянская супольнасць і палітычная апазіцыя адчувалі псіхалагічныя стрэсы і не праяўлялі той актыўнасці, якую маглі б праявіць».

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру