Праглядзеў фільм «Генэрал няскончанай вайны» пра С. Булака-Балаховіча 9
Фільм зроблены добра, на ўпэўненую «чацьвёрку», але атрымаўся занадта патэтычны для такой неадназначнай асобы.
Паглядзеў белсатаўскі фільм пра генэрала Булака-Балаховіча — «Генерал няскончанай вайны».
Ня будзе лішнім сказаць, што Станіслаў Булак-Балаховіч — ці не адзіны выбітны беларускі вайсковец 20-га стагодзьдзя і той чалавек, з кім маглі быць зьвязаныя бадай што найбольш рэальныя спадзяваньні на незалежнасьць Беларусі ў той час. Кансалідацыя незалежніцкіх сілаў вакол Балаховіча, утварэньне беларускай дзяржавы ў зьвязе з Польшчай пад яго дыктатурай — такі сцэнар можна сабе ўявіць. Але што ў 1920-х, што ў 2010-х, беларускі нацыянальны рух мае адныя і тыя ж праблемы.
Чамусь у фільме не разглядаецца найбольш спрэчны эпізод з гісторыі арміі Балаховіча, а менавіта «габрэйскае пытаньне»: з аднаго боку габрэйскія пагромы, якія нібы ладзілі ягоныя жаўнеры, і з другога боку габрэйскі атрад, які нібыта быў у складзе яго войска. Так ці іначай, вельмі не хапае канкрэтна выказанай па гэтым пазыцыі.
Не хапае таксама крытыкі Балаховіча з боку ўраду БНР, толькі мімаходам прыводзіцца выказваньне самога Булака-Балаховіча, што так і не атрымалася дамовіцца аб дапамозе з кіраўніцтвам Слуцкага збройнага чыну.
Фільм зроблены якасна, на ўпэўненую «чацьвёрку». Наколькі разумею, у фільме ўпершыню публікуецца знойдзеная ў Эстоніі кінахроніка тых часоў, на якой бачым Булака-Балаховіча і яго жаўнераў.
Але ж для такой досыць неадназначнай фігуры фільм атрымаўся, здаецца, усё ж досыць патэтычным. Хаця напэўна ж і ў Польшчы здымаюцца патрыятычныя фільмы пра той час, дзе аўтары ня надта пераймаюцца наконт Санацыі, рэпрэсій супраць іншадумцаў і турмы ў Бярозе-Картускай. Як і ў Расеі часта падаюць выключна станоўчы вобраз СМЕРШ і маршала Жукава ці ва Ўкраіне — Сьцяпана Бандэры. Пытаньне ў тым, ці варта нам такімі ж мэтадамі ствараць сабе нацыянальныя міты і нацыянальных герояў. Хаця хіба ж ёсьць іншыя мэтады для гэтага?
Фільм ёсьць на торэнтах, у Вконтакте і на сайце Белсата:
