Радаслаў Сікорскі, wyborcza.pl
Міністр замежных спраў Польшчы Радаслаў Сікорскі чарговым разам заклікаў беларускія ўлады да правядзення «сістэмных зменаў у сферы дэмакратыі і правоў чалавека».
«З павагай і добразычлівасцю мы назіраем за станаўленнем беларускай дзяржаўнасці», — сказаў Сікорскі, выступаючы 8 красавіка ў польскім сейме.
«Але ў постсавецкіх рэаліях незалежнасць не можа ўмацавацца без прасоўвання дэмакратыі. Дэкларуючы волю да шырокага ўзаемадзеяння з Беларуссю,
мы нязменна падштурхоўваем беларускія ўлады да ажыццяўлення сістэмных зменаў», — заявіў міністр.
Паводле слоў Сікорскага, такія змены «павінны ахопліваць, зыходзячы з прынцыпаў дэмакратыі і правоў чалавека, у тым ліку права на правядзенне свабодных сходаў, што асабліва тычыцца польскай меншасці ў Беларусі».
«Чаго мы і патрабуем», — падкрэсліў кіраўнік МЗС.
***
Нагадаем, у 2005 годзе ў грамадскім аб’яднанні «Саюз палякаў на Беларусі» (СПБ) адбыўся раскол. З таго часу ў краіне існуюць два Саюзы палякаў — афіцыйны, зарэгістраваны Міністэрствам юстыцыі Беларусі, і неафіцыйны, які падтрымліваюць улады Польшчы.
У пачатку 2010 года канфлікт паміж прадстаўнікамі СПБ абвастрыўся з‑за права ўласнасці на Дом польскі ў пасёлку Івянец Валожынскага раёна. 17 лютага суд Валожынскага раёна прыняў рашэнне на карысць зарэгістраванай структуры СПБ.
15 і 17 лютага дзесяткі актывістаў неафіцыйнага СПБ былі затрыманы міліцыяй за правядзенне несанкцыянаваных акцый пратэсту, а кіраўнікі арганізацыі паўсталі перад судом. Гэтыя дзеянні выклікалі асуджэнне афіцыйнай Варшавы і Еўрасаюза.
25 лютага адбылася сустрэча Радаслава Сікорскага з Аляксандрам Лукашэнкам. На ёй было прынята рашэнне аб стварэнні двухбаковай камісіі па ўрэгуляванні канфлікту вакол СПБ.
Першае пасяджэнне камісіі прайшло ў Мінску 19 сакавіка. У ім узялі ўдзел толькі чыноўнікі дзвюх краін, прадстаўнікоў грамадскасці на пасяджэнне не запрасілі.
Каментуючы вынікі, прэс‑сакратар апарату ўпаўнаважанага па справах рэлігій і нацыянальнасцей Беларусі Міхаіл Рыбакоў заявіў, што ўдзельнікі сустрэчы «выказалі задавальненне пазіцыямі бакоў і намер працягваць дыялог». Тэрміны чарговага пасяджэння камісіі павінны быць узгоднены знешнепалітычнымі ведамствамі Беларусі і Польшчы. Рыбакоў падкрэсліў: беларускі бок застаецца на сваіх ранейшых пазіцыях неўмяшання дзяржавы ў сітуацыю ўнутры Саюза палякаў.
