У аўторак 15 чэрвеня ў Мінскім абласным судзе (Свярдлова, 3) адбудзецца разгляд пратэсту пракуратуры Мінскага раёну на апраўдальны прысуд Івану Міхайлаву. Паседжанне пачнецца а 10-й гадзіне.
Нагадаем, што 31 траўня суд Мінскага раёну апраўдаў Івана Міхайлава, які праз рэлігійныя перакананні адмаўляўся служыць у войску.1 лютага гэты самы суд прызнаў Івана вінаватым ва ўхіленні ад вайсковай службы і прысудзіў яго да 3 месяцаў зняволення. Калі да канца адбывання пакарання засталося зусім нічога, калегія Мінскага абласнога суда адмяніла ранейшае рашэнне і прызначыла новы разгляд справы.
«Мы звязваем дзеянні пракуратуры з нежаданнем выплаціць Міхайлаву кампенсацыю за незаконны арышт», — распавёў «НН» каардынатар кампаніі «За альтэрнатыўную грамадзянскую службу» Міхась Пашкевіч. Ён лічыць, што апраўдальныя прысуды ў дачыненні да Івана Міхайлава і Змітра Смыка б’юць па аўтарытэце пракуратуры, выяўляючы адпаведную якасць яе працы. У выпадку з Міхайлавым стаіць яшчэ і пытанне кампенсацыі за маральныя і фізічныя страты ў выніку трохмесячнага арышту. «Іван пакуль не выставіў нейкіх канкрэтных прэтэнзій, яле ён пра гэта думае», — паведаміў М. Пашкевіч. Па яго словах, дакладна вядома, што свой пратэст пракуратура ўнясе і на апраўдальны вердыкт Гомельскага абласнога суда, датычны З. Смыка.
