У Мінску адкрылася выстава да 115-годдзя з дня нараджэння Кандрата Крапівы

У галерэі «Лабірынт» прайшло адкрыццё выставы «Патрыярх беларускай сатыры», прысвечанай 115-годдзю з дня нараджэння народнага пісьменніка Беларусі Кандрата Крапівы (Кандрата Кандратавіча Атраховіча).

Літаратурна-дакументальная выстава раскрывае шматграннасць сатырычнага таланту класіка беларускай літаратуры, паэта-сатырыка, празаіка, драматурга, вучонага-лінгвіста, аднаго з самых вядомых прадстаўнікоў нацыянальнай культуры — Кандрата Крапівы.

На выставе прадстаўлены цэнныя матэрыялы з архіва пісьменніка, якія захоўваюцца ў фондах Дзяржаўнага музея гісторыі беларускай літаратуры: рукапісы, лісты, фатаграфіі розных гадоў, дакументы, асабістыя рэчы, кнігі.

Дырэктар Дзяржаўнага музея гісторыі беларускай літаратуры Лідзія Макарэвіч лічыць, што творчасць Кандрата Крапівы недаацэненая.

«Я проста ўпэўнена, што калі б сёння на сцэне Купалаўскага тэатра ці любога іншага была пастаўлена яго п’еса „Хто смяецца апошнім“ ці „Брама неўміручасці“, мы зусім па-іншаму паглядзелі б на творчасць гэтага чалавека. Тое, што ўнёс у беларускую літаратуру Кандрат Крапіва, варта пераймання і прадаўжэння ў будучых пакаленняў творцаў», — сказала яна.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ