Бадзей: без дэвальвацыі рубля эканоміцы Беларусі пагражае калапс 10

Эканоміка Беларусі мае патрэбу ў тэрміновай дэвальвацыі курсу нацыянальнай валюты. Пра гэта заявіў старшыня бізнэс-саюзу прадпрымальнікаў і наймальнікаў імя Куняўскага Георгі Бадзей.

У інтэрв'ю Інтэрфаксу ён заявіў, што дэвальвацыя будзе спрыяць стварэнню пазабіржавага валютнага рынку і выхаду з валютнага крызісу.

«Уведзены Нацбанкам мараторый на якія-колечы дзеянні — гэта спроба схавацца ад развязвання праблем. Можна вітаць заявы банку пра тое, што яны будуць ствараць пазабіржавы рынак, але трэба ствараць і ўмовы, пры якіх ён будзе працаваць. А такая ўмова адна — дэвальвацыя рубля.

Рубель трэба адпусьціць у свабоднае плаванне», — заявіў Бадзей.

Ён адзначыў, што ўжо сёння шмат якія прамысловыя прадпрыемствы вымушаныя замарозіць рэалізацыю сваіх інвестыцыйных праграмаў і закуп сыравіны і абсталявання па імпарце.

«Такое становішча не можа быць бясконцым, яно не працягнецца і месяца. Зараз паказальныя для прамысловасці нават некалькі дзён. Усё гэта можа прывесці да калапсу не толькі ў вытворчасці, але і ў цэлым на рынку», — лічыць Бадзей.

Ён таксама не выключыў магчымасці дэфолту.

«Дэфолт — гэта вельмі балюча для насельніцтва, але вельмі карысна для прамысловасьці,якая атрымлівае ў гэтых умовах шокавы штуршок да разьвіцьця», — сказаў Бадзей.

Радыё Свабода

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ