Памёр Мікалай Бірукоў — адзін з першых вайскоўцаў, што прысягнуў на вернасць Беларусі. 9

Прысяга на вернасць Беларусі 8 верасня 1992 года. На першым плане: палкоўнік Уладзімір Барадач, маёр Алесь Станкевіч, падпалкоўнік Мікола Бірукоў, палкоўнік Леанід Балвановіч. На другім плане: лідэр БНФ Зянон Пазняк і падпалкоўнік Мікола Статкевіч.

«З глыбокім смуткам паведамляем, што сёння на 55-м годзе жыцця пасля працяглай хваробы памёр падпалкоўнік запасу, кандыдат тэхнічных навук Мікалай Бірукоў

, — значыцца ў некралогу, складзеным яго таварышамі. — Старшы выкладчык Мінскага вышэйшага інжынернага зенітна-ракетнага вучылішча Мікалай Мікалаевіч Бірукоў быў у ліку тых афіцэраў, якія ў 1980-х гадах далучыліся да руху за дзяржаўную незалежнасць Беларусі. Ён быў адным з заснавальнікаў і актыўных сябраў Беларускага згуртавання вайскоўцаў — грамадскай арганізацыі, якая выступала за стварэнне самастойнага беларускага войска.

8 верасня 1992 г. — у Дзень вайсковай славы — Мікалай Бірукоў быў у ліку вайскоўцаў, якія першыя прысягнулі на вернасць Беларусі.

З пачатку 1990-х гадоў Мікалай Бірукоў далучыўся да беларускага сацыял-дэмакратычнага руху, стаў сябрам Беларускай сацыял-дэмакратычнай Грамады. Быў міжнародным сакратаром Беларускай сацыял-дэмакратычнай партыі (Народнай Грамады).

За сваю патрыятычную дзейнасць Мікалай Бірукоў зведаў рэпрэсіі з боку генералітэту, вымушаны быў пакінуць вайсковую службу.

Выказваем глыбокае спачуванне родным і блізкім Мікалая Мікалаевіча, усім яго сябрам.

У нашай памяці Мікалай Бірукоў назаўсёды застанецца як надзейны і шчыры таварыш, які канца свайго жыцця захаваў вернасць Бацькаўшчыне і ідэалам дэмакратыі», — адзначаецца ў спачуванні.

Ліст падпісаны імёнамі сацыял-дэмакратаў і сяброў Беларускага згуртавання вайскоўцаў. Гэта Уладзімір Барадач, Леанід Дзейка, Анатоль Гурыновіч, Валер Костка, Віталь Малашка, Анатоль Сідарэвіч, Алесь Станкевіч, Мікалай Статкевіч, Станіслаў Суднік, Алег Трусаў, Сяргей Чыслаў.

Унесці ў спіс імя Міколы Статкевіча, які зараз знаходзіцца ў СІЗА КДБ, вырашылі паплечнікі. «Мікола мусіць развітацца з сваім таварышам хоць бы сімвалічна», — адзначыў лідэр БСДП Анатоль Сідарэвіч.

Развітанне з Мікалаем Біруковым адбудзецца ў аўторак, 12 красавіка, да 12 гадзін дня ў рытуальнай зале 9-й бальніцы (вул. Сямашкі, 8). Пахаваюць Мікалая Бірукова на могілках у Калодзішчах.

СМ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ