Прыбалтыйскія банкі прапануюць даляры па 6,4—14,4 тыс. беларускіх рублёў 2

Ва ўмовах фактычнага паралічу рынку наяўнай валюты ў Беларусі магчымасць легальна купіць СКВ за беларускія рублі даюць літоўскія і латвійскія банкі.

У абменных пункце банка «Цытадэль» (раней «Парэкс») на чыгуначным вакзале Вільні, які працуе кругласутачна, долары можна прадаць за 6.080 і купіць за 6.360 рублёў.

У «Медыцынскім банку» на размешчаным побач аўтавакзале крос-курс складае 6.000–6.850 рублёў.

Гэтыя курсы прыкладна адпавядаюць каціроўкам беларускага чорнага наяўнага рынку і курсам пераліку кошту тавару прадпрымальнікамі.

Значна даражэйшы долар у банках Латвіі.

17 чэрвеня курс куплі наяўнага долара ў банку «Норвік» складаў 4.709,5 рубля, продажу — 14.414,3.

У гэтым банку 26 мая быў зафіксаваны рэкордны курс продажу амерыканскай валюты — 20.240 рублёў. Безнаяўныя аперацыі банк праводзіць па дагаворным курсе.

Меншая маржа ў латвійскім аддзяленні шведскага «СЕБ-банка»: 4.950 пры куплі, 10.140 пры продажы. Аперацыі ажыццяўляюцца з безнаяўнай валютай.

Банк «Рыетуму» купляе безнаяўныя долары па 6.900 і прадае па 7.600 рублёў. У трэцяй дэкадзе мая банк практычна не ажыццяўляў аперацыі з беларускім рублём з прычыны 56-працэнтнага павышэння афіцыйнага курсу долара ў Беларусі.

Афіцыйны курс долара да беларускага рубля на 18 чэрвеня складае 4.994. У сувязі з абмежаваннем адхілення курсу ±2% айчынныя банкі не могуць выставіць курс продажу вышэй за 5.094. Валюты ў абменных пунктах па-ранейшаму няма.

Дзмітрый Уласаў, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ