Энтэрагемарагічную кішачную палачку такога ж штаму, які выклікаў успышку смяротна небяспечнага кішачнага захворвання ў Германіі (Escherichia coli O104:H4), знайшлі ў пробах вады ручая Эрленбах горада Франкфурт-на-Майне (федэральная зямля Гесэн).
Ручай працякае ў непасрэднай блізкасці ад адной з фермаў, дзе вырошчвалі салату. У лісці гэтых раслін раней былі выяўленыя небяспечныя бактэрыі.
Мясцовыя чыноўнікі запэўніваюць, што вада з гэтага ручая не трапляе ў вадаправодную сетку, таму небяспекі заражэння пітной вады няма. Аднак двум фермерскім гаспадаркам, размешчаным у непасрэднай блізкасці ад ручая, прадпісана не выкарыстоўваць яго ваду ў гаспадарчых мэтах, а таксама не ўжываць у ежу прадукты, памытыя вадой з ручая.
Мяркуецца, што
крыніцай заражэння магло стаць ачышчальнае збудаванне, паблізу якога браліся пробы вады.
Нагадаем, з пачатку траўня ў Германіі зарэгістравана больш за 3,3 тыс. выпадкаў заражэння небяспечнай інфекцыяй. Колькасць загінулых дасягнула 38 чалавек.
Паводле інфармацыі Інстытута імя Роберта Коха, Федэральнага інстытута па ацэнцы рызыкі і Федэральнага ўпраўлення па абароне спажыўцоў і бяспекі харчовых прадуктаў Германіі ад 10 чэрвеня, крыніцай распаўсюджвання ўспышкі, выкліканай Escherichia coli O104:H4, паслужылі праросткі бабовых і іншых культур (у тым ліку такіх, як залацістая і фасоля, сачавіца, люцэрна). Успышка па-ранейшаму сканцэнтраваная ў Германіі.
Жыхарам Германіі рэкамендавана не ўжываць у ежу сырыя праросткі, незалежна ад крыніцы паступлення прадукту. Грамадзянам і прадпрыемствам грамадскага харчавання прапанавана знішчыць наяўныя запасы праросткаў, а таксама любыя іншыя харчовыя прадукты, якія маглі з імі судакранацца.
