Што такое «Спорт-пары» і чым яно валодае 3

Закрытае акцыянернае таварыства «Спорт-пары» зарэгістравана 6 верасня 2007 года і з’яўляецца першым аператарам электронных інтэрактыўных гульняў на тэрыторыі Беларусі.

Сузаснавальнікамі «Спорт-пары» былі беларуска-англійскае прадпрыемства «Дзелавая сетка», Прэзідэнцкі спартовы клуб (узначальвае сярэдні сын Лукашэнкі — Дзмітрый), а таксама ПУП «СЕН-КО».

На сёння першыя двое застаюцца акцыянерамі таварыства. Таксама да іх далучаецца ПУП «БТ Тэлекамунікацыі».

Да «Спорт-пары» належаць наступныя латарэі: «Спортлато 5 з 36», «КЕНА», «Спорт-прагноз». Сімвалам таварыства з’яўляецца сава.

Таксама ў Беларусі існуюць латарэйныя кампаніі «Беларускія латарэі» (праводзіць перадачу «Ваша лато») і «Нацыянальныя спартыўныя латарэі» («Суперлато»).

Іронія лёсу, што ў той момант, калі міністры замежных справаў краін Еўрасаюза прымалі эканамічныя санкцыі па Беларусі, у найгалоўным на партале tut.by знаходзіўся матэрыял «Прызнанне на міжнародным узроўні».

У артыкуле паведамлялася, што 8 чэрвеня ў Хельсінкі на Генеральнай асамблеі Еўрапейскай латарэйнай асацыяцыі «Спорт-пары» было прынятае ў якасці сябра ў гэтую арганізацыю, якая аб’ядноўвае 70 нацыянальных латарэй еўрапейскіх краін.

«Дадзены факт выразна сведчыць пра міжнароднае прызнанне „Спорт-пары“, празрыстасці гульнявых тэхналогій, давер да палітыкі, што праводзіць кампанія», — пішацца ў матэрыяле.

Паведамляецца, што «Спорт-пары» з’яўляецца кандыдатам на ўступленне ў Міжнародную латарэйную асацыяцыю. 20 чэрвеня супраць таварыства ўведзеныя санкцыі Еўрасаюза. Гэта значыць, што міжнародныя рахункі кампаніі будуць блакаваныя.

З выхадам на міжнародны ўзровень «Спорт-пары» давядзецца пачакаць.

ЗП

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ