Рэальны пакупнік. Індыя афіцыйна выказала зацікаўленасць у акцыях «Беларуськалія» 25

Пра гэта паведаміў журналістам у чацвер пасол Індыі ў Беларусі Манодж Кумар Бхарата.

«Мы ўжо абазначылі праз урадавыя каналы, што Індыя зацікаўлена ў куплі акцый «Беларуськалія», калі яны будуць прапанаваныя», — сказаў дыпламат. «Мы з нецярпеннем чакаем рашэння ўрада Беларусі», — дадаў ён.

У чэрвені першы віцэ-прэм’ер Беларусі Уладзімір Сямашка паведаміў, што Беларусь рыхтуе IPO «Беларуськалія» — аднаго з найбуйнейшых у свеце вытворцаў калійных мінеральных угнаенняў. Пэўны пакет акцый «Беларуськалія» мелі прадаць на адной з біржаў. Гэта было лагічнае рашэнне ў рынкавым духу. Перш чым прадаваць вялікую долю акцый пакетам, варта было б прыцаніцца да попыту на біржы.

Гэтае рашэнне ўрада сведчыла таксама, што яму не ўдалося прадаць долю ў «Беларуськаліі» «Уралкалію» па цане, якую яны першапачаткова выставілі.

IPO «Беларуськалія» можа стаць самай значнай прыватызацыйнай аперацыяй за апошнія гады. IPO — гэта тэрмін для першай публічнай прапановы акцый.

З заявы пасла Індыі вынікае, што азіяцкая краіна хацела б набыць акцыі «Беларуськалія» пакетам, на дамоўных умовах.

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ