Што хвалюе сучасных менестрэляў і даследчыкаў культуры? з пошты рэдакцыі 1

Усеабдымны крызіс моцна закрануў як сацыяльна-эканамічныя аспекты нашага жыцця, так і сферу мастацтва, а таксама выдавецкую дзейнасць.

Колькасць беларускамоўных выданняў у рэспубліцы няўхільна памяншаецца, а значныя навуковыя даследаванні ў галіне культуразнаўства сустракаюцца ўсё радзей. Няўжо ўсеагульная «млявасць і абыякавасць» насельніцтва пераможа ў барацьбе за адраджэнне роднага краю?

Добрым дапаможнікам для людзей, якія цікавяцца мінуўшчынай нашай Айчыны, будзе выдадзеная два месяцы таму манаграфія кандыдата навук, дацэнта Ірыны Шумскай «Музыка ў кантэксце беларуска-польскага міжкультурнага ўзаемадзеяння».

Гэтая праца распавядае пра творчую спадчыну і жыццёвы лёс шматлікіх прадстаўнікоў беларуска-польскай культурнай прасторы, дзейнасць якіх пераважна адбывалася ў першай палове ХХ стагоддзя. Нягледзячы на тое, што сваім паходжаннем і ідэйнымі памкненнямі гэтыя выдатныя асобы маюць непасрэднае дачыненне да Беларусі, іх імёны для большасці нашых суайчыннікаў па-ранейшаму застаюцца невядомымі.

Узгадайма, напрыклад, Сымона Рака-Міхайлоўскага, якога мы звычайна згадваем як грамадскага дзеяча і барацьбіта за вольнасць роднай Беларусі. І далёка не ўсім вядома, што Рак-Міхайлоўскі быў, апроч таго, яшчэ і выдатным кампазітарам, збіральнікам народных спеваў. Альбо такая постаць, як Мечыслаў Карловіч, будзе знаёмая хіба што музыказнаўцам, але не беларускім абывацелям, большасць з якіх увогуле на чула пра гэтае імя. Між тым, народжаны на Беларусі ў шляхетнай сям’і Карловічаў-Сулістроўскіх, Мечыслаў набыў сусветную славу як геніяльны кампазітар-сімфаніст, які цудоўна прадставіў у сваёй музыцы традыцыйны беларускі мелас. І такіх імёнаў можна ўзгадаць яшчэ шмат…

Прэзентацыя кнігі адбудзецца 7 верасня ў Музее тэатральнай і музычнай культуры Беларусі (завулак Музычны, 5)

ў межах літаратурна-музычнай вечарыны пад рамантычнай назвай «МЕНЕСТРЭЛІ ІМКЛІВАЙ ЭПОХІ». Дадзеная акцыя будзе праходзіць пры падтрымцы Польскага Інстытута ў Мінску.

Апроч прадстаўлення новага выдання, у праграме мерапрыемства: адмысловая канцэртная праграма ад трыа «Вытокі» пад кіраўніцтвам лаўрэата міжнародных конкурсаў, вядомага музыканта і краязнаўцы Аляксея Фралова (прагучаць творы Міхала Клеафаса Агінскага, Станіслава Манюшкі, Фларыяна Міладоўскага, Яна Тарасевіча і інш.), музычная паэзія Ірыны Хадарэнка і розныя прыемныя сюрпрызы.

Пачатак імпрэзы, а 17 гадзіне.

І. Грышановіч

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ