Пачалося засяленне ў студэнцкія інтэрнаты БДУ 2

Як паведамілі ў прэс-службе ўніверсітэта, студэнтаў прымуць сем інтэрнатаў, адзін з якіх адкрыўся пасля капітальнага рамонту. Усяго ў іх выдзелена каля 5,5 тыс. месцаў, з іх дзве трэці дадуць першакурснікам.

З гэтага года засяленне ў інтэрнаты забяспечваецца аўтаматызаваным праграмным модулем «Студгарадок». Камп’ютарная праграма кантралюе ўсе этапы механізму выдзялення жылля — ад пастаноўкі на чаргу, заключэння дагавора да аплаты за інтэрнат. Чакаецца, што ўкараненне праграмы дазволіць значна спрасціць і паскорыць этапы засялення.

Як адзначылі ў прэс-службе БДУ, па ініцыятыве студэнцкага гарадка ўніверсітэта сёлета працягне працу электронны банк даных аб кватэрах і пакоях, якія здаюць у арэнду ў сталіцы. Уся неабходная інфармацыя размешчана на сайце www.bsu.by.

Акрамя таго, для растлумачэння пытанняў засялення ў студгарадку з 22 жніўня па 2 верасня з 9.00 да 17.00 працуе гарачая тэлефонная лінія 209-56-56.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ