Ні сабе ні людзям: стаў вядомы час пачатку матчу «Мінск» — БАТЭ 4

«Наша Ніва» раней паведамляла, што матч 28-га тура чэмпіянату Беларусі па футболе паміж «Мінскам» і БАТЭ перанесены з 15-га на 14 кастрычніка (пятніца). Звязаны той перанос з гасцявой гульнёй БАТЭ у Мілане ў Лізе чэмпіёнаў.

Сёння сталі вядомы месца і час правядзення гульні.

Пройдзе яна на «Тарпеда» і пачнецца а 14-й гадзіне, бо на гэтым стадыёне адсутнічае электраасвятленне, паведамляе афіцыйны сайт БАТЭ

Дзіўна, чаму не правесці было б гэту гульню вечарам пятніцы на стадыёне «Дынама», дзе «Мінск» у мінулым туры, 1 кастрычніка, прымаў жодзінскае «Тарпеда».

Зацягнуць матч «Мінск» — БАТЭ (гульню з сяміразовым чэмпіёнам краіны напярэдадні яго візіту ў Мілан) на «Тарпеда», да таго ж паставіўшы пачатак матчу на 14-ю гадзіну…

На каго тады футбол разлічаны ў нашай краіне і як можна казаць пра яго папулярызацыю.

Добра хоць уваход зрабілі вольны.

АГ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ