Заробак мінскіх бюджэтнікаў амаль на 20% ніжэйшы за сярэднегарадскі ўзровень 2

Намінальны налічаны сярэднямесячны заробак у бюджэтных арганізацыях Мінска ў студзені-верасні 2011 года вырас на 53,3% у параўнанні з аналагічным перыядам мінулага года пры росце заробка ў сярэднім па горадзе на 44,6%.

Разам з тым рэальны налічаны заробак бюджэтнікаў (разлічаны з улікам росту спажывецкіх цэн на тавары і паслугі) за гэты перыяд павялічыўся на 12,7%, паведамляе Галоўнае статыстычнае ўпраўленне Мінска.

«Нягледзячы на ​​больш высокія тэмпы росту намінальнай і рэальнай налічанай сярэднямесячнай заработнай платы ў бюджэтных арганізацыях, узровень аплаты працы работнікаў гэтых арганізацый адстае ад сярэднегарадскога», — адзначаюць ва ўпраўленні.

У студзені-верасні налічаная намінальная сярэднямесячная зарплата работнікаў бюджэтных арганізацый сталіцы склала 1 млн 796,6 тыс. рублёў, у верасні — 2 млн 361,9 тыс. рублёў. Гэта ніжэй за сярэднегарадскі ўзровень аплаты адпаведна на 19,5 і 17,1%.

Вышэйшы заробак у бюджэтнай сферы адзначаны ў работнікаў арганізацый, якія займаюцца навуковымі даследаваннямі і распрацоўкамі, — 2 млн. 311,5 тыс. рублёў, а таксама дзейнасцю ў галіне адпачынку і забаў, культуры і спорту, — 2 млн. 139,4 тыс. рублёў. Гэта на 28,7 і 19,1% вышэй, чым у сярэднім у бюджэтных арганізацыях Мінска.

Пры гэтым зарплата работнікаў адукацыі ў студзені-верасні складала 1 млн 573,5 тыс. рублёў, аховы здароўя — 1 млн 697,6 тыс. Гэта на 12,4 і 5,5% ніжэй за сярэднегарадскі паказчык зарплаты работнікаў бюджэтных арганізацый.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ