«Адвакату, з якім заключыў дамову Сяргей Міхалок, паведамілі, што тэрмін пракурорскай праверкі працягнуты на тры месяцы. А таксама прызначаная лінгвістычная экспертыза», — дзеліцца свежымі навінамі прадстаўнік гурта «Ляпис Трубецкой» Зміцер Безкаравайны.
Следчы пракуратуры Цэнтральнага раёна Мінска Аляксандр Бачыла, які выклікаў Сяргея, што яму падабаюцца песні «Ляпісаў», гэтым разам размаўляць адмовіўся.— Без каментароў!
— На якім этапе цяпер разбіральніцтва?
— Тое ж самае адкажу.
—: Можа быць, хаця б скажаце, пра які выраз ці пра якую размову ідзе гаворка?
— Адкрыйце інтэрнэт — убачыце.
— То бок гэта тое інтэрв’ю, пра якое ўсе думаюць?
— Угу.
— Калі Міхалок прыедзе, ці будзе ён неяк абмежаваны ў правах?
— Без каментароў!
— А ў вышук будзеце яго абвяшчаць?
— Без каментароў!
Інстытут мовы і літаратуры Акадэміі навук, які, як правіла, робіць моўныя экспертызы, запыту з пракуратуры пакуль не атрымаў.Дырэктар установы Аляксандр Лукашанец чуў пра «справу» Сяргея Міхалка. Але пакуль разбіраць словы лідара «Ляпісаў» не бярэцца.
— Калі раптам да мяне прыйдзе афіцыйны запыт, то адказ будзе залежаць ад таго, як сфармуляванае пытанне. Таму я не хачу, каб мая думка на гэты конт як спецыяліста дзесьці фігуравала, — тлумачыць навуковец.
Сам жа Сяргей Міхалок пакуль вяртацца ў Беларусь не плануе і абжываецца ў маскоўскай кватэры.
Сяргей Міхалок: «Я застаўся ў Маскве не таму, што я баюся гэтых судовых разбіральніцтваў. Я застаўся ў Маскве, бо хачу быць у страі. На паўгода наперад распісаныя гастролі нашага гурта, і гэта галоўнае. Гэта маё прызначэнне, гэта мая місія. Людзі, якія спецыялісты ў адвакатуры, юрыспрудэнцыі мне сказалі, што калі я вярнуся ў Мінск, то на час разбіральніцтва хутчэй за ўсё з мяне возьмуць падпіску аб нявыездзе, а можа, нават забяруць пашпарт. А канцэрты, як вы ведаеце, — рэч святая, адмяняць іх нельга. Таму я сфакусуюся на сваім гастрольным графіку, буду гэтым займацца, а кантора няхай піша.