Лукашэнка раздаў узнагароды за раскрыццё тэракта: не дапусцілі разгулу злачыннасці 12

«У краіне не дапусцілі разгулу злачыннасці і хаосу. Беларусь застаецца мірнай і згуртаванай краінай», — заявіў Аляксандр Лукашэнка 31 кастрычніка на цырымоніі ўручэння дзяржаўных узнагарод.

Як паведамляе прэс-служба прэзідэнта, Лукашэнка ўручыў узнагароды ваеннаслужачым і супрацоўнікам праваахоўных органаў. «Мы ўзнагароджваем людзей, якія мелі непасрэднае дачыненне да раскрыцця тэракта ў мінскім метро. І тых, хто ахоўвае парадак нашай радзімы кожны дзень», — сказаў ён.

Паводле слоў Лукашэнкі, на фоне ўзброеных канфліктаў, якімі ахоплены сучасны свет, «кожны разумее, што галоўнае ў жыцці — гэта чыстае неба над галавой, спакой і ўпэўненасць нашых людзей у заўтраўшнім дні».

Кіраўнік дзяржавы таксама ўручыў дыпломы і ганаровыя знакі групе металургаў з Магілёва, якія распрацавалі перадавую тэхналогію ліцця і арганізавалі прадпрыемства па выпуску інавацыйнай прадукцыі.

Дзяржаўнай прэміі таксама ўдастоены распрацоўшчыкі кар’ерных самазвалаў асабліва вялікай грузапад’ёмнасці. «Эфектыўныя канструктарскія рашэнні значна павысілі канкурэнтаздольнасць і перавагі нашых машын. Гэта дазваляе БелАЗам утрымліваць больш за 30% сусветнага рынку велікагрузнай тэхнікі ва ўмовах жорсткай канкурэнцыі з боку транснацыянальных кампаній», — сказаў Лукашэнка.

Ён адзначыў дасягненні і сучаснай беларускай медыцыны. Лукашэнка ўручыў узнагароды ўрачам-траўматолагам, якія стварылі сучасную тэхналогію хірургічнага лячэння артапедычнай паталогіі тазасцегнавога сустава ў дзяцей і падлеткаў. «Гэтая методыка мае прынцыповую навізну ў сусветнай медыцыне і носіць назву „беларускай“. Дзякуй вам за высакародную самаадданую працу. Ваша распрацоўка не толькі павысіла прэстыж Беларусі ў сусветнай супольнасці, але, што самае галоўнае, дапамагла вярнуць здароўе многім юным грамадзянам Беларусі і іншых краін», — сказаў афіцыйны лідар.

За ўклад у развіццё айчыннага мастацтва дзяржпрэмій удастоены архітэктары і мастакі, у тым ліку стваральнікі мемарыяла «Дзецям — ахвярам Вялікай Айчыннай вайны» і серыі графічных работ «Вароты мінулага».

Таццяна Каравянкова, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ