Auf Wiedersehen, Herr Stange! — фотарэпартаж 2

Бернд Штанге і старшыня федэрацыі футбола Сяргей Румас.

Гер Штанге апошні раз уваходзіць у свой кабінет.

Бернд Штанге на сённяшняй прэс-канферэнцыі падвёў вынікі свайго знаходжання ў стырна нацыянальнай зборнай Беларусі (з ліпеня 2007 г.).

«Усім дзякуй за чатыры з паловай гады сумеснай працы, за дапамогу і падтрымку. На жаль, за гэтыя гады нам не ўдалося выканаць мэту, пастаўленую федэрацыяй [заняць 2-е месца ў групе Еўра-2012].

Гэта віна трэнерскага штаба і кожнага асобна ўзятага гульца зборнай. Тым не менш, быў рух наперад.

Нам удалося даць імпульс маладой дваццацігадовай федэрацыі.

Ці можа беларускі трэнер ўзначаліць зборную? У Беларусі ёсць шмат маладых, таленавітых трэнераў. Я не магу каго-небудзь з іх рэкамендаваць федэрацыі. Адзінае, скажу, што беларускай зборнай патрэбен трэнер з агнём у сэрца, які валодае харызмай.

Кім было прынята рашэнне аб разрыве нашых адносін? Проста-проста скончыўся мой кантракт. Я прапрацаваў тут чатыры з паловай гады, гэта прыстойны тэрмін. Колькі трэнераў у Еўропе прабылі на сваёй пасадзе столькі ж часу? Не так ужо і шмат.

Вядома, былі і памылкі з майго боку, ніхто без іх не абыходзіцца.

У кожнай гульні былі рэчы, якія можна было б зрабіць лепш. Але самае важнае — мы абралі сваю лінію і выразна яе прытрымліваліся. Гэта было правільна», — цытуе словы Штанге Goals.by.

***

Бернд Штанге ўзначаліў зборную Беларусі ў ліпені 2007 г. і пад яго кіраўніцтвам зборная правяля 49 афіцыйных і таварыскіх матчаў.

Адборачны турнір да чэмпіянату свету 2010 года зборная завершыла на 4-м месцы з 13 баламі (4 перамогі, 1 нічыя, 5 паразаў, розніца мячоў 19–14). Першыя тры месцы занялі: Англія (27 балаў), Украіна (21), Харватыя (20). Зборная Беларусі апярэдзіла Казахстан (6), Андору (0).

У адборачным турніры да чэмпіянату Еўропы 2012 года Беларусь фінішавала таксама на 4-м месцы і таксама з 13 баламі: 3 перамогі, 4 нічыі, 3 паразы, розніца мячоў 8–7. Першыя тры месцы занялі: Францыя (21), Боснія (20), Румынія (14). Падапечныя Штанге апярэдзілі Албанію (9) і Люксембург (4).

У адборачным турніры да чэмпіянату свету 2014 года зборная Беларусі, якой цяпер будзе кіраваць новы трэнер, выступіць у адной групе з чэмпіёнамі свету 2010 года і Еўропы 2008 г. зборнай Іспаніі, а таксама Францыяй, Фінляндыяй і Грузіяй.

Фотарэпартаж Сяргея Гудзіліна

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ