У Брэсце адкрыты пункты прыёму рэчаў ад насельніцтва для маламаёмных 5

Як паведаміла намеснік начальніка ўпраўлення па працы, занятасці і сацыяльнай абароне насельніцтва Брэсцкага гарвыканкама Іна Ступнікава, адзін з пунктаў пачаў працу на базе тэрытарыяльнага цэнтра сацыяльнага абслугоўвання насельніцтва Ленінскага раёна Брэста, другі — на базе тэрытарыяльнага цэнтра сацабслугоўвання Маскоўскага раёна.

У гэтыя пункты можна прыносіць на бясплатнай аснове адзенне для дарослых і дзяцей, абутак як новы, так і ўжываны, але ў добрым стане, школьна-пісьмовыя прылады і іншыя рэчы. Затым сабранае будуць перадаваць жыхарам горада з сацыяльна ўразлівых слаёў, у тым ліку: малазабяспечаным адзінокім састарэлым; шматдзетным і няпоўным сем’ям; асобам без пэўнага месца жыхарства; грамадзянам, якія вярнуліся з месцаў пазбаўлення волі.

«Мы і раней рэгулярна аказвалі такую дапамогу гэтай катэгорыі жыхароў нашага горада. Галоўным чынам за кошт рэчаў, атрыманых з-за мяжы па гуманітарнай лініі, — адзначыла Ступнікава. — Адкрыццё гэтых пунктаў дазволіць перадаць гараджанам, якія маюць патрэбу, больш неабходных ім рэчаў, а таксама прыцягнуць увагу грамадскасці да праблем сацыяльна ўразлівых слаёў насельніцтва».

Пункты прыёму рэчаў ад насельніцтва працуюць па будных днях з 8.30 да 17.00.

«У першую палову дня 21 лістапада сюды ўжо прыйшлі больш за 20 чалавек, якія прынеслі добрыя рэчы для дзяцей і дарослых», — адзначыла Ступнікава.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ