Партыя БНФ на пасяджэнні сойма 28 студзеня ў Мінску прыняла рашэнне ўдзельнічаць у парламенцкіх выбарах 2012 года, але пакінула за сабой права зняць сваіх кандыдатаў.
«Калі да пачатку датэрміновага галасавання ў краіне застануцца палітзняволеныя і калі ўсе нашы прадстаўнікі не будуць уключаны ва ўчастковыя выбарчыя камісіі, мы знімем сваіх кандыдатаў з выбараў», — заявіў лідар партыі Аляксей Янукевіч.
У рашэнні, прынятым соймам, канстатуецца, што
«ў краіне адсутнічае легітымны дэмакратычны механізм», і нават абранне прадстаўнікоў апазіцыі ў склад палаты прадстаўнікоў «пры існуючай практыцы арганізацыі правядзення выбараў не можа служыць падставай для прызнання гэтага органа».
Сойм таксама лічыць, што «ва ўмовах фактычнай адсутнасці выбарчага працэсу і сумленнага падліку галасоў як удзел у выбарах, так і байкот не могуць быць рэалізаваныя ў поўнай меры».
Партыя мае намер арганізаваць кампанію па як мага больш шырокім вылучэнні сваіх членаў і прыхільнікаў у выбарчыя камісіі.Як мага большую колькасць кандыдатаў у дэпутаты Партыя БНФ мае намер вылучаць партыйным спосабам.
Статус кандыдата ў дэпутаты партыя мае намер выкарыстаць для інфармацыйнай кампаніі па данясенні сваёй пазіцыі па найбольш важных пытаннях жыцця краіны, у прыватнасці аб пагрозе эканамічнаму і палітычнаму суверэнітэту Беларусі ад удзелу ў ЕўрАзЭС і АДКБ.
Акрамя таго, партыя мае намер акцэнтаваць увагу грамадства на праблемах практыкі прымянення выбарчага заканадаўства і бессэнсоўнасці датэрміновага галасавання.