Бенедыкт XVI прызначыў у Беларусі свайго ганаровага прэлата 5
Ганаровым папскім прэлатам прызначаны ксёндз Андрэй Стэцкевіч — генеральны вікарый Мінска-Магілёўскай архідыяцэзіі.
«Гэта прызначэнне робіцца Святым Айцом за асаблівыя заслугі перад царквой», — растлумачылі ў Рымска-каталіцкай царкве. Святары, якія атрымалі такі тытул, далучаюцца да бліжэйшага кола супрацоўнікаў пантыфіка і атрымліваюць прывілеі насіць асаблівую вопратку малінавага колеру.
Ксёндз Андрэй Стэцкевіч — доктар тэалогіі. З 1999 года — ганаровы каплан Папы, а з 6 чэрвеня гэтага года святар пачаў служыць ужо ў якасці генеральнага вікарыя Мінска-Магілёўскай архідыяцэзіі.
За час свайго святарскага служэння Стэцкевіч адбудаваў духоўную семінарыю ў Санкт-Пецярбургу, дзе выкладаў, кафедральны касцёл і курыю ў Маскве і пракатэдральны касцёл у Санкт-Пецярбургу і г.д. З’яўляўся выкладчыкам духоўнай семінарыі ў Санкт-Пецярбургу. Чытае спецкурсы ў семінарыі ў Пінску і універсітэтах Мінска (у асноўным па біяэтыцы).
