Знайсці
04.05.2020 / 22:00РусŁacБел

«Ураджай» купалаўцаў, тэатр Сінгапура і contemporary цырк: новая падборка анлайн-відовішчаў на тыдзень

На чарговым тыдні нават у самаізаляцыі вы можаце адкрыць для сябе яшчэ некалькі тэатральных пляцовак. Гэтым разам далучаемся да Купалаўскага тэатра, слухаем Венскую оперу, глядзім тэатральную камедыю з Сінгапура, пазнаём ізраільскі «Гешэр» і «ідзём» у шведскі contemporary цырк.

Панядзелак: «Ураджай», Купалаўскі тэатр

Фота kupalauski.by

Тэатр імя Янкі Купалы, для якога пандэмія каранавіруса прыпала на юбілейны соты сезон, гатовы паказаць анлайн адзін з найлепшых спектакляў сваёй камернай сцэны. «Ураджай» быў пастаўлены па п’есе вядомага сучаснага драматурга Паўла Пражко, што паходзіць з Беларусі, але на беларускай сцэне гучыць не часта. Пастаноўка Дзмітрыя Цішко — тут задзейнічана ўсяго чатыры акцёры — з гумарам расказвае пра сучаснае пакаленне: героі «Ураджаю» мусяць сабраць яблыкі, але кожная дробная задача, што ўзнікае перад няўклюдамі, пераўтвараецца ледзь не ў эпапею.

Дзе глядзець: у мабільнай прыладзе VOKA альбо на сайце voka.tv
Калі глядзець: а 19-й 4 мая

Аўторак: «Яўгеній Анегін», Венская дзяржаўная опера

Адна з галоўных оперных пляцовак свету — менавіта тут праходзяць знакамітыя Венскія балі — хоць і не можа запрасіць гледачоў у свой будынак, затое прадстаўляе раскошную праграму анлайн-паказаў пастановак апошніх гадоў. Кожны дзень новая опера альбо балет, а на 5 мая прыпадае трансляцыя адной з найноўшых работ тэатра — гэта будзе добра знаёмы «Яўгеній Анегін» Пятра Чайкоўскага, увасоблены Фалькам Рыхтэрам у 2019 годзе. У плане на іншыя дні — оперы «Дон Кіхот» і «Вертэр» Жуля Маснэ, «Пурытане» Вінчэнца Беліні, «Вольны стралок» фон Вэбера, балет «Пер Гюнт» Эдварда Грыга ды іншыя.

Дзе глядзець: на сайце Венскай оперы па рэгістрацыі
Калі глядзець: кожны дзень а 20-й па беларускім часе

Серада: Chinchilla Arschloch, waswas, тэатральны фестываль Theatertreffen (Нямеччына)

Фота berlinerfestspiele.de

Гэта павінен быў быць паўнавартасны двухтыднёвы пяцьдзясят сёмы тэатральны фестываль са спектаклямі, абмеркаваннямі і дыскусіямі. Але каманда Theatertreffen не разгубілася з нагоды пандэміі і арганізавала фестываль анлайн — з 1 да 9 мая ён паказвае сучасныя нямецкія пастаноўкі, а таксама арганізуе анлайн-размовы і дэбаты. Спектакль «Chinchilla Arschloch, waswas» — капрадукцыя некалькіх тэатральных калектываў Германіі — будзе паказвацца з англійскімі субцітрамі. Пасля адбудзецца абмеркаванне пастаноўкі з удзелам творчай групы (але ўжо без перакладу). У праграме фестывалю яшчэ пяць нямецкіх тэатральных работ — расклад можна знайсці на пляцоўцы Theatertreffen.

Дзе глядзець: па спасылцы
Калі глядзець: спектакль будзе паказаны а 21-й 6 мая і застанецца ў доступе на 24 гадзіны, абмеркаванне пастаноўкі — у 22.50.

Чацвер: «Нагляд», тэатр Wild Rice (Сінгапур)

Фота wildrice.com.sg

Сінгапурскі тэатр Wild Rice прапанаваў у дні «кавіду» забаўляць гледачоў у камфорце гасцёўні, таму паказвае свае хіты анлайн. У гэтыя дні — камедыю «Нагляд» паводле Томаса Ліма, што «захоплівае» і «разрывае сэрцы». Па сюжэце дачка сварлівага 71-гадовага пенсіянера, які толькі перажыў інсульт, наймае для бацькі хлопца з Інданезіі ў якасці сядзелкі, а з гэтага пачынаецца ўвесь замут. Па чацвяргах Wild Rice таксама арганізуе абмеркаванні паказаных спектакляў — да размовы можна далучыцца якраз у чацвер 7 мая.

Дзе глядзець: спасылка даступная на сайце тэатра
Калі глядзець: да 8 мая, абмеркаванне — у 16.00 па беларускім часе 7 мая

Пятніца: Любы з выкладзеных спектакляў тэатра «Гешэр» (Ізраіль)

Фота са спектакля King David Report

У Тэль-Авіве ёсць такі ўшанаваны фестывальнымі ўзнагародамі тэатр «Гешэр», назва якога перакладаецца як «мост». Ён быў створаны эмігрантамі з Савецкага Саюза і адпаведна сваёй назве стаў мостам паміж рускай і ізраільскай культурай. У час пандэміі «Гешэр» напоўніў свой YouTube-канал запісамі пастановак розных гадоў. Сярод іх, напрыклад, спектаклі паводле лаўрэата Букераўскай прэміі Давіда Гросмана, паводле вядомага ізраільскага пісьменніка Меіра Шалева альбо паводле пісьменніка і журналіста Ёрама Канюка. Частка выкладзеных у агульны доступ запісаў суправаджаецца субцітрамі.

Дзе глядзець: на YouTube-канале тэатра
Калі глядзець: калі заўгодна 

Субота: «Інтэртэйнмэнт. Магчыма ўсё», платформа Okko (Расія)

Фота Okko Тэатр

Платформа Okko і рэжысёр Іван Вырыпаеў, якога вы можаце ведаць у тым ліку па кіно, прадставілі работу ў асобным жанры фільма-спектакля. «Інтэртэйнмэнт. Магчыма ўсё», які абяцае «смешна і лёгка» расказаць «пра складанае і духоўнае», даступны на Okko — праўда, не бясплатна — з 17 красавіка. Двух і адзіных герояў іграюць сам Вырыпаеў і яго жонка, польская актрыса Караліна Грушка. Па сюжэце яны прыходзяць глядзець спектакль, але ўрэшце мусяць разбірацца, дзе тут рэальнасць, а дзе выдумка.

Дзе глядзець: на платформе Okko
Калі глядзець: лавіце момант

Нядзеля: Цыркавое шоу Circus Cirkör (Швецыя)

WILAC Into a Cirkus Mind from Cirkus Cirkor on Vimeo.

У якасці вішанькі на торце — шведскі калектыў Circus Cirkör як адзін з гульцоў «новага цырка», што сумяшчае цыркавыя нумары з іншымі відамі мастацтва кшталту музыкі, танца альбо драмтэатра. Пара пастановак Circus Cirkör, якія то захапляюць, то прымушаюць смяяцца, то выклікаюць замілаванне, з нагоды пандэміі зараз даступныя на сайце калектыву.

Дзе глядзець: на сайце цырка
Калі глядзець: пакуль ёсць у доступе

Ірэна Кацяловіч

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера