Годнае футбольнае «класіка»: БАТЭ і мінскае «Дынама» забілі чатыры мячы за 15 хвілін. Аднак хто мацнейшы, так і не выявілі
Сталічны клуб за чвэрць гадзіны забіў лідару першынства больш, чым усе астатнія каманды за пяць папярэдніх тураў. Аднак нават за кошт дубля Івана Бахара не здолеў нанесці барысаўчанам першую паразу ў сезоне.
БАТЭ застаецца лідарам першынства, нягледзячы на нічыю ў «класіка». Фота: vk.com/fcbate
Чарговы тур у элітным футбольным дывізіёне краіны звёў да бар'ера прынцыповых апанентаў. Барысаўскі БАТЭ, што з пачатку сезона выключна перамагаў, наведаўся ў Мінск да пераследвальнікаў з «Дынама». У пасіве гасцей напярэдадні сустрэчы меўся толькі адзіны гол, што рабіла іх абарону найлепшай у краіне. Аднак трапны стрэл Івана Бахара на 65-й хвіліне сапсаваў «жоўта-блакітным» статыстыку ды паставіў пад пагрозу пераможную серыю.
Да таго ж гол справакаваў пікавыя эмоцыі ў заўзятараў, якіх па пратаколе сабралася на стадыене на рэкорд сезона, ажно 10 361 глядач. Адзін з іх не здолеў стрымаць пачуцці ў сабе ды выбег на поле, каб павіншаваць Бахара з рэалізаваным пенальці.
Прыхільнік мінскага «Дынама» віншуе з рэалізаваным пенальці Івана Бахара. Фота: скрыншот трансляцыі abff.by
Тым не менш БАТЭ як сапраўдны лідар першынства ўдар вытрымаў годна. І спачатку нагамі экс-дынамаўца Драгуна аднавіў раўнавагу, а пасля і ўвогуле перахапіў ініцыятыву за кошт шыкоўнага стрэлу Філіпавіча здалёк.
Барысаву пасля гэтага заставалася пратрымацца 12 хвілін, каб зафіксаваць валявую вікторыю — трывання хапіла толькі на дзве. Усё той жа Бахар паспеў на дабіванне ды выратаваў «Дынама», зафіксаваўшы выніковы лік 2:2.
Нічыя дазволіла ўскараскацца на другі радок табліцы «Энергетыку». Мінчане сталі галоўным пераследвальнікам БАТЭ за кошт феерычнай гульні Абдзіхалікава ў Гродне: узбекскі форвард адкрыў лік хет-трыкам першынства ды стаў галоўным ініцыятарам разгрому «Нёмана».
Пазітыўнага выніку дамогся і «Шахцёр», які аформіў першую перамогу на чале з Сяргеем Ташуевым. Чэмпіён да 93-й хвіліны змагаўся з трывалай абаронай «Гомеля» — і толькі за кошт гола з пенальці Дарба здолеў зваяваць тры ачкі.
А вось жодзінскае «Тарпеда» пацярпела чарговую паразу — гэтым разам ад «Белшыны». Лік 1:3 у матчы з камандай, што толькі-толькі вярнулася ў эліту з першага дывізіёну, выглядаў сапраўдным прысудам не толькі «аўтазаводцам», але і галоўнаму трэнеру.
Як вынік, у найбліжэйшыя гадзіны чакаецца звальненне Дзмітрыя Молаша з пасады — вакансію ўжо гатовы заняць Іван Біёнчык. Той, што сам пратрымаўся на чале «Шахцёра» толькі тры туры ды першым у сезоне застаўся без працы.
Пасля шасці тураў БАТЭ з 16 ачкамі захаваў лідарства, на тры балы менш у «Энергетыка», на чатыры — у мінскага «Дынама».
