Галоўчанка чуе сігналы
Прэм'ер-міністр Раман Галоўчанка заявіў, што з Захаду ўсё больш актыўна паступаюць сігналы аб жаданні працаваць з Беларуссю, нягледзячы на санкцыі. Ён сказаў гэта ў сённяшнім эфіры праграмы «Контуры» на тэлеканале АНТ.
Раман Галоўчанка. Фота: АНТ
Паводле слоў Галоўчанкі, за паўгода экспарт Беларусі ў «недружалюбныя краіны» склаў 3,5 млрд даляраў.
«Вядома, з 17 млрд даляраў нашага экспарту гэта нямала. Я думаю, што нейкае працверажэнне ўсё роўна адбудзецца.
Больш таго, сігналаў пра гатоўнасць працаваць з намі вельмі шмат. Санкцыі, якія ўводзяцца і ў дачыненні да Расіі, і Беларусі, яны рыкашэтам б'юць па тых, хто гэта робіць.
Еўропа рыхтуецца да вельмі цяжкай зімы. Адмовіцца ад газу, не адмовіцца, мыцца радзей, кандыцыянеры не ўключаць і гэтак далей. Дзікунства! Беларуская паліўная драўніна, пелеты, еўрапелеты так званыя дапамаглі б вырашыць пытанне для насельніцтва. Таму, я думаю, вельмі хутка мы ўбачым пэўныя змены. Чалавек заўсёды галасуе, як гэта гаворыцца, халадзільнікам», — лічыць ён.
