Знайсці
08.09.2022 / 16:237РусŁacБел

«А вы па-беларуску размаўляеце, таму што прынцып? У нас рускамоўная школа, у дырэктара адразу будуць пытанні»

Дзіўны дыялог адбыўся ў адной са школ, калі журналістка Беларускага расследавальніцкага цэнтра патэлефанавала туды пад выглядам педагога, які шукае працу.

Ілюстрацыйны здымак

У адміністрацыі навучальнай установы адзначылі, што ім патрэбны настаўнік фізкультуры. А пасля запыталіся:

— А вы па-беларуску размаўляеце, таму што прынцып ці вучыліся ў гэтай школе беларускамоўнай?

— Ну я заўсёды размаўляла па-беларуску. А трэба будзе гаварыць па-руску?

— Ну з бацькамі і з дзецьмі. У нас рускамоўная школа, размаўляем мы ўсе на рускай мове. Калі ідзе ўрок беларускай мовы і літаратуры, зразумела, што беларуская мова. Ну вось глядзіце, вы прыйдзеце да дырэктара, пачняце размаўляць на беларускай мове — усё, адразу ж, як бы: «Чаму?»

— Мы жывём у Беларусі, чаму гэта так дзіўна, што чалавек размаўляе на беларускай?

— Не, гэта не дзіўна… Калі б вы былі настаўнік беларускай мовы — зразумела.

Журналістка таксама пыталася, ці будзе перашкодай пры працаўладкаванні тое, што педагога затрымлівалі па адміністрацыйным артыкуле за мітынгі. У школе адказалі: адназначна не змогуць узяць, хоць настаўнік ім і вельмі патрэбны.

Праз пратэсную адміністратыўку адмовілі і ў іншай школе.

— Я бачыла аб'яву ў інтэрнэце, што вы шукаеце настаўніка пачатковых класаў. Ці актуальная яшчэ гэтая аб'ява? — запыталася журналістка.

— Угу.

— Але ёсць такое пытанне. Мяне затрымлівалі па адміністрацыйнай справе — ці гэта будзе праблемай?

— За ўдзел у мітынгах?

— Так.

— Так, гэта будзе праблемай. Мы будзем пасылаць афіцыйны запыт на вашу характарыстыку, гэта будзе пазначана ў характарыстыцы, і, на жаль, з такім артыкулам мы не можам узяць на працу чалавека.

— Можа, вы ведаеце, дзе з такім артыкулам могуць узяць? Бо я ўжо шукаю даўно працу.

— Не ў дзяржаўнай установе. Рэч у тым, што ў нас жа строгі алгарытм. Як толькі чалавек да нас прыходзіць, перш чым узяць яго на працу, мы даём запыт у ГУУС аб наяўнасці судзімасці, прыводаў і ўсяго астатняга, даём запыт на характарыстыку вызначанага ўзору на папярэдняе месца працы. І толькі пасля гэтага маем права ўзяць чалавека на працу. Гэта дэкрэт, які рэгламентаваў прыём на працу ў дзяржаўныя ўстановы.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
0
Банапарцюк/адказаць/
08.09.2022
Дык а нічога не змянілася за 20 год. Каклі на мове размаўляеш, то бэнээфавец, калі на трасянцы, то калгаснік. А вось калі на вялікай і магутнай, то адукаваны і сапраўдны беларус.
0
Валошка/адказаць/
09.09.2022
У маёй школе выкладчыца рускай мовы адкрыта казала, што яе мова вялікая, а нашая прымітыўная. Як доказ прыводзіла верш вялікага Пушкіна і яго сапраўды кепскі пераклад на беларускую. І колькі такіх шавіністаў у дзяржаўных установах рознага ўзроўню?
0
Янка/адказаць/
09.09.2022
Валошка, у такога роду сітуацыях трэба прапаноўваць апаненту пачытаць якіх-колечы 50 старонак Германа Гесэ "Гульня шкляных перлаў", пераклад Васіля Сёмухі. 
У дадзенай сітуацыі прафесійная прымітыўнасць і непісьменнасць настаўніцы зашкальваюць.
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера