На Вілейскім вадасховішчы пабачылі вельмі рэдкую ў нас птушку
«На Вілейскім вадасховішчы арнітолагі Аляксандр Анкуда і Ганна Ільінкова заўважылі рэдкую арктычную госцю — чорную казарку. Гэта вельмі рэдкі для Беларусі залётны міграцыйны від, у ХХІ cтагоддзі ў нас было ўсяго некалькі яго назіранняў», — піша тэлеграм-канал «Дзікая прырода побач».
Фота Аляксандра Анкуды
Чорная казарка — самая маленькая з усіх казарак, памерам са свойскую качку. Гняздуецца яна ў паўночнай тундры на марскім узбярэжжы. Цікава, што гэтыя птушкі ладзяць «дзіцячыя садкі»: пары часам аб’ядноўваюць вывадкі і трымаюцца групамі з дзясяткаў ці соцень птушак.
Фота Аляксандра Анкуды
На зімоўку чорныя казаркі звычайна ляцяць уздоўж марскога ўзбярэжжа, а праз кантынентальныя раёны пралятаюць з іх адзінкі, таму ў нас іх і бачаць вельмі рэдка.
