Да канца года ўлады хочуць «зверыць» усіх пагалоўна вайсковаабавязаных
Да канца бягучага года ўліковыя звесткі будуць звераныя ва ўсіх без выключэння вайсковаабавязаных, якія стаяць на вайсковым уліку ў Беларусі, паведаміла прэс-служба Міністэрства абароны.
У Беларусі працягваецца, як сцвярджае Міністэрства абароны, планавая праверка ўліковых звестак вайсковаабавязаных, якая праводзіцца па даручэнні Лукашэнкі. Выклік грамадзян робіцца позвамі.
Абяцаюць, што ў сярэднім працэдура праверкі зойме не больш за 15 хвілін, пасля чаго грамадзяне змогуць спакойна ісці дадому.
Калі раней зверка праводзілася з вайсковаабавязанымі, якія працаўладкаваныя ў прыватных і дзяржаўных арганізацыях, то цяпер праверыць звесткі плануюць ва ўсіх вайсковаабавязаных без выключэнняў.
Для завяршэння працэдуры неабходна з'явіцца ў пункты збору вайсковых камісарыятаў, мясцовых выканаўчых і распарадчых органаў.
