Навукоўцы разгадалі шыфр караля Карла V і нарэшце прачыталі яго ліст, напісаны пяць стагоддзяў таму
Французскія навукоўцы расшыфравалі ліст караля Іспаніі і кіраўніка Святой Рымскай імперыі Карла V, які ён адправіў у 1547 годзе свайму паслу ў Парыжы Жану дэ Сен-Мары. Аказалася, кіраўнік турбаваўся аб падрыхтоўцы замаху на яго, піша France24.
Ліст захоўваецца ў бібліятэцы горада Нансі ў Латарынгіі. Амаль пяць стагоддзяў яго ніхто не мог прачытаць. Крыптографцы Сесіль П'еро і яе камандзе ўдалося гэта зрабіць за паўгода. Навукоўцам дапамог ліст дэ Сен-Мары, на палях якога атрымальнік пазначыў таемны код.
Як аказалася, Карл V выкарыстаў складаны шыфр — пісаў сімвалы, якія абазначаюць цэлыя словы, пазначаў асаблівым чынам галосныя літары і імкнуўся заблытаць ворагаў «нулявымі сімваламі», якія нічога не значылі.
У лісце паслу Карл V звярнуў увагу на ўскладненне адносінаў з каралём Францыі Францыскам I. Яно здарылася, нягледзячы на падпісаную трыма гадамі раней мірную дамову. Імператара турбавалі чуткі аб падрыхтаваным на яго замаху.
Пра планы забойства Карла V гісторыкам вядома мала, але ліст адкрыў страхі манарха і сапсаванне яго адносін з Францыяй. Цяпер навукоўцы спадзяюцца расшыфраваць іншыя лісты імператара і атрымаць з іх большае ўяўленне пра стратэгію Карла V у Еўропе.