«Там п*ц, загінулі сотні». Навагодні візіт Яўгена Прыгожына ў морг можа быць звязаны з паспяховым ударам украінскай артылерыі па Макееўцы
Яўген Прыгожын 1 студзеня палічыў неабходным апублічыць шакуюча натуралістычнае відэа свайго візіту ў морг, куды звозяць загінулых расійскіх байцоў.
Расійскі вайсковы аб'ект у Макееўцы пасля ўдару ўкраінскай артылерыі ўначы з 31 снежня на 1 студзеня. Фота: сацыяльныя сеткі
У навагоднюю ноч Расія традыцыйна спрабавала атакаваць аб'екты інфраструктуры ва ўкраінскай сталіцы і абласных цэнтрах. Украінскае камандаванне заявіла, што ўсе 45 дронаў над рознымі абласцямі краіны збітыя.
Выбухі гучалі ў тым ліку і ў Кіеве. Журналісты гэтым разам не паведамляюць пра сур'ёзныя наступствы. Мяркуючы па ўсім, усе дроны былі збітыя на падлёце да ўкраінскай сталіцы.
У той жа час з паведамленняў расійскіх ваенкараў вынікае, што расійская армія панесла сур'ёзныя страты блізка ад лініі фронту.
«Напэўна, сапсую чытачам навагодні настрой, але павінен прызнаць, што … трагедыі з дзясяткамі загінулых не вучаць гэтых дэбілаў з дыпломамі вайсковых вучэльняў і акадэмій. Тут не напішаш, што менавіта падштурхнула напісаць гэтыя радкі, але тыя, хто ў тэме, ведаюць», — напісаў сёння ваенкар Уладлен Татарскі.
«Цікава, за халатнасць, тупарыласць і пафігізм некаторых генералаў, якія прыводзяць да сур'ёзных наступстваў і гібелі байцоў не толькі на перадавой, але і ў тыле, хто-небудзь калі-небудзь адкажа перад законам?» — паўтарае за ім ваенкар Бяссонаў.
Ніякай інфармацыі ў афіцыйных расійскіх СМІ, што ж здарылася, няма.
Яны абмежаваліся паведамленнем, што ўкраінская артылерыя нанесла ўдар па шпіталі прыфрантавога горада Першамайска, дзе нібыта загінулі шэсць чалавек — інфармацыя расійскіх СМІ з лініі фронту звычайна адрозніваецца крайняй недакладнасцю. Інфармацыю пра ўдар у Першамайску для РІА «Новості» пракаментаваў кіраўнік прыватнай вайсковай кампаніі «Вагнер» Яўген Прыгожын.
У той жа час у мясцовых чатах пішуць, што ўкраінская артылерыя нанесла ўдар па вучылішчы ў Макееўцы пад Данецкам, дзе размяшчаліся расійскія салдаты. Мы сабралі некалькі скрыншотаў.
Мясцовыя жыхары гавораць пра сотні ахвяр — інфармацыя, якую немагчыма пацвердзіць. Такая колькасць ахвяр магчымая толькі ў выпадку, калі ў будынку размяшчалася вельмі шмат вайскоўцаў адначасова, што было б крайне рызыкоўна.
Блогер Анатоль Шарый сцвярджае, што ў Макееўцы загінулі сотні расійскіх вайскоўцаў.
Тэлеграм-канал supernova_plus паказвае, як будынак вучылішча выглядаў да ўдару і пасля ўдару.
Яўген Прыгожын 1 студзеня чамусьці палічыў патрэбным апублічыць шакуюча натуралістычнае відэа свайго візіту ў морг, куды звозяць загінулых расійскіх байцоў.
«Іх кантракт закончаны. Паедуць дамоў — праз тыдзень. У Новы год усе працуюць», — сказаў Прыгожын, гаворачы з журналістамі, якіх прывёз з сабой, у памяшканні, напоўненым чорнымі пластыкавымі мяхамі з целамі.
Яўген Прыгожын падчас навагодняга візіту ў морг. 1 студзеня 2023 года. Скрыншот з відэа
«Яўген Віктаравіч, а хто тут ляжыць?» — пытаецца чалавек за кадрам.
«Тут ляжаць байцы ПВК «Вагнер», якія загінулі на фронце. І якіх з пашанай зараз адвязуць, пакладуць у цынк і павязуць дамоў. Якія загінулі гераічна», — сказаў Прыгожын.
«Вагнер» фармальна лічыцца прыватнай кампаніяй, але фактычна створаны і дзейнічае пры Галоўным разведупраўленні Генштаба расійскай арміі, а сам Прыгожын — асабліва набліжаны да Уладзіміра Пуціна прадпрымальнік, які дзякуючы гэтаму стаў мільярдэрам. Ëн стаў адыгрываць асаблівую ролю ў вайне ва Украіне пасля таго, як рэгулярная расійская армія паказала сваю нізкую баяздольнасць і матывацыю. Прыгожын зрабіў стаўку на вярбоўку зняволеных у турмах, а ваяваць сваіх байцоў матывуе касмічнымі па расійскіх мерках заробкамі.
Нядаўна Прыгожын абараняў двух сваіх байцоў, якія запісалі зварот, у якім брудным крымінальным слэнгам ганілі кіраўніка Генштаба Расіі генерала Валерыя Герасімава за дэфіцыт боепрыпасаў на фронце.
Расійскі шавіністычны ваенкар Бяссонаў пазней дадаў у сябе ў канале: «З нагоды ўдару па Макееўскім ПТВ. Мясцовыя паведамляюць, што ўдар быў нанесены роўна ў 00:01 па нашым часе. Па маіх звестках праціўнік чарговы раз ужыў амерыканскую РСЗА «Хаймарс». Мяркуючы па ўсім, высокае камандаванне да гэтага часу не ў курсе аб магчымасцях гэтай зброі. Спадзяюся, што вінаватыя, якія прымалі рашэнне па выкарыстанні гэтага аб'екта, будуць пакараныя».
Яшчэ пазней расійскія СМІ пацвердзілі, што а 23:58 31 снежня ўкраінская артылерыя нанесла знішчальны ўдар па будынку ПТВ у Макееўцы, дзе размяшчаліся вайскоўцы, мабілізаваныя з Саратаўскай вобласці.
«Ёсць загінулыя і параненыя, дакладная іх колькасць пакуль невядомая», піша Readovka, блізкая да ПВК «Вагнер».
Поўнае знішчэнне аб’екта ваенкары тлумачаць тым, што ў ім захоўваўся таксама і боекамплект.
Чытайце таксама: «Ты пі*ар». Вагнераўцы звярнуліся да начальніка Генштаба РФ
