Apple збіраецца выпусціць ноўтбук з сэнсарным дысплеем
Кампанія Apple працуе над ноўтбукам з сэнсарным дысплеем. Першы такі камп'ютар з'явіцца ў 2025 годзе.
Навінку прэзентуюць як частку маштабнага абнаўлення MacBook Pro. Ужо ідзе праца над праектам гаджэта, але яго вытворчасць пакуль не запушчана.
Больш за 10 гадоў Apple адкідала ідэю выпусціць ноўтбук з сэнсарным экранам. У кампаніі заяўлялі, што дастаткова планшэтаў iPad, а ў свой час Стыў Джобс і зусім раскрытыкаваў ідэю, назваўшы яе «жудаснай з эрганамічнага пункту гледжання».
Зрэшты, у кампаніі дагэтуль не ўпэўненыя, што MacBook з сэнсарным экранам не ўдарыць па продажах iPad. Але змяніць стаўленне да такіх гаджэтаў вырашылі з-за канкурэнтаў, якія ўжо дадаюць сэнсарныя экраны ў свае ноўтбукі.
Мяркуюць, што першы «яблычны» ноўтбук з сэнсарным экранам выпусцяць у традыцыйным дызайне, пры гэтым экран будзе падтрымліваць сэнсарны ўвод.
