Мінск хоча дамовіцца з Масквой аб рэфінансаванні даўгоў
Беларусь не мае намеру павялічваць суму запазычанняў у Расіі, а спрабуе дамаўляцца аб рэфінансаванні існуючых даўгоў. Пра гэта ў інтэрв'ю тэлеканалу «Беларусь 1» распавёў міністр фінансаў Беларусі Юрый Селіверстаў.
Фота: Мінабароны Беларусі
Паводле яго слоў, цяпер атрымліваць пазыкі на еўрапейскіх рынках Беларусь не можа з-за санкцый, а з асноўным даўгавым партнёрам — Расіяй (на яе долю прыпадае прыкладна 70% усіх знешніх запазычанняў) прапрацоўваюцца рашэнні аб рэфінансаванні даўгоў.
«У нас ёсць абавязацельствы пагашэння даўгоў перад Еўразійскім фондам стабілізацыі і развіцця, ёсць тыя крэдыты, якія мы бралі ў выглядзе міждзяржкрэдытаў у Расіі пры розных абставінах. Ёсць рашэнні, што мы можам займаць для бюджэту на расійскай фондавай біржы наўзамен еўрапейскіх інстытутаў, якія ўжылі супраць нас санкцыі. Гаворка ідзе не аб павелічэнні запазычанняў, а аб рэфінансаванні тых даўгоў, якія ў нас ужо былі, — не 100%, але ў нейкай частцы, каб нам лягчэй было іх пагашаць, а таксама абслугоўваць нашы абавязацельствы», — сказаў Селіверстаў.
Пры гэтым ужо дасягнута дамоўленасць аб тым, што плацяжы ў пагашэнне абслугоўвання запазычанасці па ўсіх дзяржкрэдытах Беларусі з сакавіка 2022-га па красавік 2023 года ў агульнай суме $1,4 млрд пераносяцца на перыяд з 2028-га па 2033 год.
У жніўні мінулага года Менск дамовіўся з Масквой аб новым крэдыце прыкладна на $1,5 млрд для рэалізацыі імпартазамяшчальных праектаў. Частка сумы на стварэнне вытворчасцей ужо пералічаная.
Паводле справаздачы Сусветнага банка, Беларусь — найбуйнейшы даўжнік Расіі па стане на 2021 год. На канец 2019 года Мінск быў павінен Маскве $8,1 млрд, але за два гады доўг вырас да $8,5 млрд.
