Мінздароўя: Штам «кракен» у Беларусь яшчэ не прыйшоў, большасць хварэе на грып
Міністэрства аховы здароўя паведамляе, што выпадкаў заражэння ў нас варыянтам «кракен» пакуль што не выявілі. У Расіі новы штам каранавіруса ўжо зафіксавалі.
Сярод рэспіраторных вірусаў, якія цяпер цыркулююць у Беларусі, пераважаюць вірусы грыпу — іх больш за 80%. Асноўныя — вірус грыпу А(H1N1)pdm09, вірус грыпу B і А(H3N2).
Новы варыянт каранавіруса, імаверна, з'явіўся ў выніку заражэння аднаго чалавека двума рознымі варыянтамі амікрона. «Кракен» атрымаўся больш заразным.
Упершыню варыянт ХВВ.1.5 («кракен») быў выяўлены ў кастрычніку 2022 года ў ЗША і цяпер дамінуе на тэрыторыі ЗША. Таксама новы варыянт зафіксаваны як мінімум у 35 іншых краінах.
Сусветная арганізацыя аховы здароўя лічыць, што гэты падварыянт, хоць і больш заразны, не з'яўляецца больш сур'ёзным або шкодным.
