Стаміліся ад дзірак у калготах? Вось як захаваць іх цэлымі

Напэўна, кожная жанчына сутыкалася ў жыцці з дзіркамі ці стрэлкамі на капронавых калготах. Ëсць некалькі эфектыўных спосабаў працягнуць калготам жыццё.

Фота: pixabay.com

Несумненна, калготы — тая частка жаночага гардэробу, якую пашкодзіць лягчэй за ўсё. Гэта пацвердзяць жанчыны, якія кожны дзень бяруць з сабой на працу пару запасных калготаў, піша onet.pl.

Добра, што ёсць спосабы прадоўжыць тэрмін нашэння калготаў.

Перш за ўсё, выберыце іх правільны памер. Калі вы набудзеце занадта маленькую пару, матэрыял будзе ўвесь час расцягвацца, што зробіць яго менш трывалым і ўстойлівым да пашкоджанняў.

Другое пытанне датычыць таго, як мы надзяваем калготы: рабіце гэта павольна, асабліва калі ў вас доўгія пазногці.

Калі на калготах з’явілася маленькая дзірка, ці, як гэта называюць жанчыны, стрэлка, скарыстайцеся бескаляровым лакам для пазногцяў. Нанясіце яго на краі дзіркі, і ён дапаможа спыніць яе распаўзанне.

Ёсць яшчэ адзін лайфхак. Перад тым, як першы раз надзяваць калготы, змачыце іх вадой і пакладзіце ў маразільную камеру прыкладна на гадзіну. Пасля гэтага дастаньце калготы, пачакайце, пакуль яны высахнуць, і можаце смела іх надзяваць. Дзякуючы такім дзеянням, калготы стануць больш трывалымі.