Знайсці
08.02.2023 / 20:5013РусŁacБел

Амерыканскі расследавальнік сцвярджае, што «Паўночны паток» знішчылі ЗША з дапамогай Нарвегіі

Выбухоўку пад газаправоды «Паўночны паток» і «Паўночны паток — 2» у чэрвені 2022-га заклалі вадалазы ЗША пад прыкрыццём вучэнняў НАТА, а актывавалі нарвежцы, сцвярджае вядомы журналіст. 

Выхад газу на газаправодзе «Паўночны паток — 2», від з дацкага знішчальніка F-16 на Борнхальме (Данія), 27 верасня 2022 г. Фота: Камандаванне абароны Даніі

Журналіст і праваабаронца Сеймур Херш, лаўрэат Пулітцэраўскай прэміі за раскрыццё ваеннага злачынства, здзейсненага салдатамі ЗША ў Сангмі падчас в’етнамскай вайны, апублікаваў расследаванне, у якім гаворыцца, што да пашкоджання «Паўночных патокаў» маюць дачыненне амерыканцы і нарвежцы. Херш сцвярджае, што Байдэн наважыўся знішчыць пабудаваныя Расіяй газаправоды пасля больш як дзевяці месяцаў сакрэтных абмеркаванняў з камандай па нацыянальнай бяспецы.

У сваім артыкуле Херш спасылаецца на ананімную крыніцу, якая «непасрэдна ведала, як быў арганізаваны працэс» і «як вялося планаванне».

«Паўночны паток» у палітыцы

Дыверсія на газаправодах «Паўночны паток» і «Паўночны паток — 2» адбылася ў ноч на 26 верасня 2022 года. Агулам на ўсіх трубах газаправодаў было выяўлена чатыры выхады газу.

Дзве трубы, вядомыя пад назвай «Паўночны паток — 1», больш за дзесяць гадоў забяспечвалі Германію і большую частку Заходняй Еўропы танным расійскім прыродным газам. Другая пара газаправодаў, якая атрымала назву «Паўночны паток — 2», пабудаваная, але не ўведзеная ў эксплуатацыю.

Як піша Херш, прэзідэнт Байдэн і яго каманда па знешняй палітыцы — дарадца па нацыянальнай бяспецы Джэйк Саліван, дзяржсакратар Тоні Блінкен і яго намесніца па палітычных пытаннях Вікторыя Нуланд — адкрыта і паслядоўна дэманстравалі сваю варожасць у дачыненні да расійскіх трубаправодаў. Прамы маршрут, без транзіту цераз Украіну, меў вялікае значэнне для эканомікі Германіі, якая карысталася лішкам таннага расійскага прыроднага газу.

Такім чынам, адзначае Херш, «Паўночны паток — 1» разглядаўся Вашынгтонам і яго антырасійскімі партнёрамі па НАТА як пагроза дамінаванню Захаду.

«Паўночны паток — 2», будаўніцтва якога было завершана ў верасні 2021 года, у выпадку адабрэння нямецкімі рэгулюючымі органамі падвоіў бы колькасць таннага газу, даступнага Германіі і Заходняй Еўропе. Паміж Расіяй і НАТА стала нарастаць напружанасць.

Калі будаўніцтва другога газаправода блізілася да завяршэння, у палітыцы Байдэна раптам адбыліся нечаканыя змены: адміністрацыя адмяніла санкцыі супраць кампаніі-ўладальніцы расійскіх газаправодаў Nord Stream AG, а прадстаўнік Дзярждэпартамента прызнаў, што спроба спыніць трубаправод з дапамогай санкцый і дыпламатыі «заўсёды была няўдалай».

Такія рашэнні выклікалі ўспышку незадаволенасці ў рэспубліканцаў і паставілі пад пагрозу аўтарытэт і палітыку Байдэна. Паведамляецца, што за кулісамі прадстаўнікі амерыканскай адміністрацыі заклікалі прэзідэнта Украіны Уладзіміра Зяленскага, які да таго часу сутыкнуўся з пагрозай расійскага ўварвання, не крытыкаваць гэты крок.

Падзеі разгортваліся на фоне таго, як расійскія войскі няўхільна і пагрозліва збіраліся ля межаў Украіны. І пакуль Еўропа заставалася залежнай ад трубаправодаў з танным прыродным газам, Вашынгтон баяўся, што такія краіны, як Германія, не захочуць забяспечваць Украіну грашыма і зброяй, неабходнымі для перамогі над Расіяй.

Распрацоўка плана

Менавіта ў гэты неспакойны момант, сцвярджае Херш, Байдэн даручыў сабраць міжведамасную групу для распрацоўкі плана.

У снежні 2021-га, за два месяцы да таго, як першыя расійскія танкі ўвайшлі ва Украіну, адбылася нарада групы, у якую ўвайшлі прадстаўнікі Аб'яднанага камітэта начальнікаў штабоў, ЦРУ, Дзяржаўнага дэпартамента і Міністэрства фінансаў. Падчас нарады абмяркоўвалі, як рэагаваць на наступ Пуціна.

Цягам наступных некалькіх сустрэч удзельнікі разглядалі варыянты пашкоджання газаправодаў, пры гэтым ЦРУ сцвярджала: што б ні было зроблена, яно павінна быць таемным. Як адзначае крыніца Херша, усе ўдзельнікі разумелі стаўкі. Калі б атаку можна было прасачыць да Злучаных Штатаў, яе адразу можна было б расцаніць як «акт вайны».

У складзе працоўнай групы ЦРУ выпадкова аказаўся чалавек, знаёмы з магчымасцямі глыбакаводных вадалазаў Вайскова-марскіх сіл ЗША ў Панама-Сіці. Удзельнікі групы пачалі распрацоўку плана сакрэтнай аперацыі, падчас якой вадалазы-глыбакаводнікі павінны былі выклікаць выбух трубаправода.

Як сцвярджае ананімная крыніца, падчас «усіх гэтых інтрыг» некаторыя супрацоўнікі ЦРУ і Дзяржаўнага дэпартамента пераконвалі: «Не рабіце гэтага. Гэта глупства, якое стане палітычным кашмарам, калі пра гэта стане вядома».

Далей, як адзначае Херш, Байдэн зноў павёў сябе непрадказальна: так, 7 лютага, менш чым за тры тыдні да наступу Расіі ва Украіну, ён сустрэўся ў Белым доме з канцлерам Германіі Олафам Шольцам і пазней на брыфінгу для прэсы задзірліва заявіў: «Калі Расія ўварвецца… «Паўночнага патоку — 2» больш не будзе. Мы скончым з ім».

Херш звяртае ўвагу, што за дваццаць дзён да гэтага намесніца дзяржсакратара Нуланд выступіла з той жа заявай на брыфінгу ў Дзярждэпартаменце, але гэта амаль не асвятлялася ў прэсе.

Некаторыя з тых, хто ўдзельнічаў у планаванні місіі па трубаправодзе, устрывожыліся, бо меркавалася, што нічога не будзе афішавацца публічна.

Нарвегія — ідэальнае месца для размяшчэння місіі

Херш піша, што за апошнія некалькі гадоў усходне-заходняга крызісу амерыканскія вайскоўцы значна пашырылі сваю прысутнасць у Нарвегіі, заходняя мяжа якой зліваецца з Расіяй за Палярным кругам. Пентагон уклаў сотні мільёнаў даляраў у мадэрнізацыю і пашырэнне аб'ектаў ВМС і ВПС ЗША ў Нарвегіі.

Сённяшні вярхоўны галоўнакамандуючы НАТА Енс Столтэнберг — перакананы антыкамуніст, які восем гадоў працаваў прэм'ер-міністрам Нарвегіі, перш чым перайсці на высокую пасаду ў НАТА пры падтрымцы Амерыкі ў 2014 годзе. Ён быў прыхільнікам цвёрдай лініі ва ўсім, што датычыла Пуціна і Расіі. З таго часу яму цалкам давяраюць. «Ён — пальчатка, якая падыходзіць амерыканскай руцэ», — сказала Хершу крыніца.

Аднак у рэалізацыі плана былі праблемы: любая незвычайная падводная актыўнасць у водах ля Борнхальма, дзе праходзяць газаправоды, магла прыцягнуць увагу шведскіх або дацкіх ваенна-марскіх сіл. Выйсцем стала рашэнне правесці аперацыю пад выглядам ваенных вучэнняў.

Як усё адбывалася

У сваім матэрыяле Херш сцвярджае, што летась у чэрвені вадалазы ВМС, якія дзейнічалі пад прыкрыццём шырока разрэкламаваных вучэнняў НАТА, вядомых як BALTOPS 22, заклалі дыстанцыйна актываваныя выбуховыя прылады, якія праз тры месяцы разбурылі тры з чатырох газаправодаў «Паўночных патокаў».

Як піша журналіст, першапачаткова планавалася зрабіць выбух адразу падчас вучэнняў, аднак потым Байдэн змяніў сваё меркаванне, бо гэта адразу выклікала б падазрэнні ў адносінах да НАТА. Таму быў распрацаваны план з дыстанцыйна кіраванымі прыладамі, якія можна было б актываваць праз некаторы час.

26 верасня 2022 года разведвальны самалёт P8 ВМС Нарвегіі здзейсніў, здавалася б, звычайны палёт і скінуў гідраакустычны буй. Сігнал распаўсюдзіўся пад вадой, спачатку на «Паўночны паток — 2», затым на «Паўночны паток — 1». Праз некалькі гадзін спрацавала магутная выбухоўка С4, і тры з чатырох трубаправодаў былі выведзеныя са строю. Праз некалькі хвілін лужынкі газу, якім былі запоўненыя трубаправоды, расцякліся па паверхні вады, і свет даведаўся, што адбылося нешта непапраўнае.

Адразу ж пасля выбуху трубаправода, адзначае Херш, амерыканскія СМІ ўспрынялі гэта як неразгаданую таямніцу. Расію неаднаразова называлі верагодным вінаватым, але матыў такога акта самасабатажу заставаўся не зусім зразумелым — хіба проста помста? 

Пасля публікацыі прадстаўніца Рады нацыянальнай бяспекі ЗША заявіла, што даныя аб дачыненні ВМС ЗША да падрыву «Паўночнага патоку — 2» з'яўляюцца «поўнай хлуснёй».

У сваю чаргу, сакратар Рады бяспекі Расіі Мікалай Патрушаў не стаў каментаваць гэтую публікацыю, пішуць расійскія дзяржаўныя СМІ.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
09.02.2023
Явно у этих «исследователей» финансирование из рф.
0
Mafkees /адказаць/
09.02.2023
Даже если бы это и не было конспирологией,а правдой,то ничего страшного в том что американцы взорвали к хренам собачьим путинский трубопровод нет-одни только плюсы.За него всеравно заплатил путен,а Евросоюз смог слезть с зависимости построил хранилища и нашел других поставщиков в рекордно быстрые сроки и теперь не нуждается в путенских энергоносителях.
0
Pedafil/адказаць/
09.02.2023
Я верю только американской пропаганде
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера