«Як табе такое, Ілан Маск?»: у сістэмы Starlink хутка з'явіцца новы канкурэнт

Гаворка ідзе пра Project Kuiper ад кампаніі Amazon, якой таксама дазволілі запусціць у космас некалькі тысяч інтэрнэт-спадарожнікаў.

Фота: vecteezy

Кампанія Amazon атрымала афіцыйны дазвол ад амерыканскай Федэральнай камісіі па сувязі (FCC) на касмічнае разгортванне 3236 шырокапалосных інтэрнэт-спадарожнікаў. Пра гэта 8 лютага паведаміў часопіс SpaceNews.

Гэтая групоўка спадарожнікаў атрымала назву Project Kuiper. Дазвол на яе эксплуатацыю выдалі пры ўмове падпісання і выканання кампаніяй новага плана па зніжэнні колькасці арбітальнага смецця, які ўключае рэгулярныя справаздачы аб стане спадарожнікаў і выразныя ўмовы іх утылізацыі па заканчэнні місіі.

Сама місія будзе доўжыцца сем гадоў на нізкай калязямной арбіце нашай планеты.

«Kuiper можа пачаць разгортванне сваёй групоўкі, каб забяспечыць высакахуткаснае, шырокапалоснае інтэрнэт-падключэнне для кліентаў па ўсім свеце», — гаворыцца ў афіцыйным дазволе ад FCC.

Яшчэ раней такі дазвол атрымала сістэма Starlink ад кампаніі SpaceX Ілана Маска, якая таксама разгарнула некалькі тысяч інтэрнэт-спадарожнікаў. Асцерагаючыся канкурэнцыі, SpaceX нават спрабавала абмежаваць магчымасці альбо замарудзіць разгортванне аналагічнай сістэмы ад Amazon.

«SpaceX заклікала FCC дазволіць выпусціць у космас толькі 538 спадарожнікаў Project Kuiper, а запуск астатніх увогуле адкласці на пэўны час. Апроч гэтага, гучалі заклікі размясціць спадарожнікі ад Amazon на больш высокай арбіце за тую, на якой ужо знаходзяцца сістэмы Starlink. Аднак камісія адпрэчыла прапановы SpaceX», — піша SpaceNews.

Паведамляецца, што першыя два спадарожнікі групоўкі Project Kuiper — Kuipersat-1 і Kuipersat-2 — будуць запушчаны ў найбліжэйшыя месяцы падчас першага палёту новай ракеты Vulcan Centaur (таксама ад Amazon).