Самы нечаканы крок Захаду. СМІ высветлілі, што ў адміністрацыі прэзідэнта РФ думаюць пра ордар на арышт Пуціна
Рашэнне Міжнароднага крымінальнага суда (МКС) у Гаазе выдаць ордар на арышт Уладзіміра Пуціна было ўспрынятае Крамлём як «самы нечаканы крок» Захаду, сцвярджаюць крыніцы «Медузы», блізкія да адміністрацыі прэзідэнта Расіі. Па словах двух суразмоўцаў выдання, расійскія ўлады аказаліся не гатовыя да гэтай сітуацыі.
У Міжнародным крымінальным судзе выдалі ордар на арышт Уладзіміра Пуціна. Фота: kremlin.ru
Больш за тое, Крэмль у 2023 годзе збіраўся прасоўваць вобраз Пуціна (напярэдадні прэзідэнцкіх выбараў) як «змагара з Захадам», «абаронцы краін Лацінскай Амерыкі і Афрыкі ад каланіяльнага прыгнёту» і «аднаго з галоўных лідараў шматпалярнага свету».
Але для гэтага неабходныя замежныя паездкі, у якіх Пуцін цяпер абмежаваны з-за рашэння МКС. Тэарэтычна, прэзідэнта РФ могуць затрымаць па гаагскім ордары ў 123 краінах. Крыніцы, блізкія да АП, адзначаюць, што пакуль у Крамлі не зусім разумеюць, як можна «забяспечыць бяспеку» Пуціна ў новых умовах.
«Нават СНД перастае быць бяспечнай прасторай [для Пуціна]», — канстатавала адна з крыніц (сярод краін, якія ратыфікавалі Рымскі статут МКС, ёсць, напрыклад, Таджыкістан).
Пры гэтым той жа суразмоўца дадаў: у Крамлі сумняваюцца, што нехта з краін, якія раней уваходзілі ў склад СССР, можа вырашыцца на арышт Пуціна, але «дзясятыя, сотыя долі працэнта [верагоднасці гэтага] заўсёды ёсць». Само затрыманне Пуціна крыніцы «Медузы» лічаць немагчымым — менавіта таму што расійскі прэзідэнт проста не паедзе ў краіну, дзе ёсць хаця б мінімальная рызыка быць арыштаваным.
Суразмоўцы «Медузы» адзначылі, што, нягледзячы на вайну, якую Расія развязала ў 2022 годзе, Уладзімір Пуцін адносна рэгулярна здзяйсняў замежныя паездкі і ўдзельнічаў у форумах і самітах. Напрыклад, летам 2022-га ён наведаў Таджыкістан, Туркменістан і Іран, а восенню — Узбекістан, Казахстан і Арменію (пры гэтым пасля 24 лютага Пуцін ні разу не выязджаў у краіны Захаду).
Паводле ацэнкі двух суразмоўцаў, блізкіх да АП, такія паездкі былі вельмі важныя, у тым ліку для ўнутрырасійскай прапаганды, якая, абапіраючыся на навіны аб гэтых візітах, магла расказаць грамадзянам, што ў Расіі сяброў усё роўна больш, чым нядобразычліўцаў і краіна застаецца «адным са слупоў шматпалярнага свету».
«Абмежаванні замежных візітаў будуць працаваць у супрацьлеглы бок. Да ордара выезды [Пуціна] спалучаліся з паездкамі лідараў замежных краін у Маскву. Цяпер падтрымаць такую ж частату сустрэч не атрымаецца — нельга пастаянна запрашаць усіх да сябе», — адзначыла адна з крыніц «Медузы».
Цяжкасці з замежнымі візітамі ўжо пачаліся: у жніўні 2023 года ў ПАР павінен прайсці чарговы саміт краін БРІКС; улады гэтай краіны 20 сакавіка заявілі, што «прынялі да ўвагі» ордар МУС.
Пры гэтым прэс-сакратар прэзідэнта Дзмітрый Пяскоў сцвярджае, што ў Крамлі ставяцца да рашэння Міжнароднага крымінальнага суда ў Гаазе «спакойна» і «працягваюць працаваць» (спікер Дзярждумы Вячаслаў Валодзін назваў ордар «агрэсіяй супраць Расіі», Следчы камітэт па даручэнні Аляксандра Бастрыкіна распачаў крымінальную справу супраць тых, хто выдаў ордар, а намеснік кіраўніка Савета бяспекі РФ Дзмітрый Мядзведзеў прыгразіў кропкавым ракетным ударам па будынку суда ў Гаазе).
Чытайце таксама:
«Відавочна, што ён здзяйсняў ваенныя злачынствы» Джо Байдэн — пра ордар на арышт Уладзіміра Пуціна
«Важна, каб працэс быў запушчаны». Вячорка — пра выдачу ордара на арышт Лукашэнкі
Германія выканае патрабаванне Міжнароднага крымінальнага суда на арышт Пуціна — міністр юстыцыі ФРГ
