Расія ўдарыла па Запарожжы — разбураныя шматпавярховікі
Расіяне абстрэльваюць Запарожжа. Пад агнём — востраў Хорціца і шматпавярховікі. На відэа, якія распаўсюджваюць у сацсетках, відаць, як ракета трапляе ў шматпавярховік — і гараць кватэры.
«Расіяне абстрэльваюць Запарожжа. Пад варожым агнём — жылыя дамы, таксама востраў Хорціца», — напісаў кіраўнік Офіса прэзідэнта Андрэй Ярмак.
Інфармацыі аб ахвярах пакуль няма, але на фота і відэа, якія распаўсюджваюць у сацсетках, відаць маштабныя разбурэнні цэлых пад'ездаў і буйныя пажары. З-за такіх разбурэнняў можа быць шмат ахвяр.
На найбліжэйшых вуліцах абмежавалі рух аўтатранспарту, паведаміла патрульная паліцыя Запарожжа.
Снарад трапіў у жылы дом. Фота: «Суспільне Запарожжа»
Да гэтага ў горадзе гучала паветраная трывога. У 11:20 Запарожская абласная ваенная адміністрацыя папрасіла людзей знаходзіцца ў бяспечных месцах да заканчэння трывогі і не публікаваць фота і відэа.
