Знайсці
24.03.2023 / 13:342РусŁacБел

Кіраўнік Крыма стварыў уласную ПВК, звязаную з Яўгенам Прыгожыным

На паўвостраве стварылі новую ваенізаваную структуру — камандуе ёй прыгожынскі куратар у Афрыцы, пішуць «Важныя гісторыі».

Чальцы «Канвою». Фота: тэлеграм-канал «Канвой»

У сакавіку гэтага года кіраўнік Крыма Сяргей Аксёнаў у эфіры крымскага тэлебачання распавёў аб з'яўленні ў Крыме прафесійнага вайсковага падраздзялення: «Хлопцы, якія прайшлі ўсё што можна, у кіраўнікоў — па некалькі ордэнаў Мужнасці, начальнік штаба — Герой Расіі».

Крыху раней у тэлеграм-канале з назвай «Канвой» было апублікавана відэа — на ім Аксёнаў інспектуе пазіцыі новага падраздзялення.

ПВК «Канвой» — адносна новае прыватнае вайсковае падраздзяленне. Яго аднайменны канал у тэлеграме быў створаны ў лістападзе мінулага года.

Нароўні з заклікамі ўступаць у ПВК і фатаграфіямі і відэа з перадавой там таксама публікуюцца філасофскія тэксты пра «моцную праваслаўную Расію» і «ўкраінскіх сатаністаў», «народ-пераможцу»; канспіратыўныя тэорыі пра тое, як Ракфелеры выкупілі сістэму водазабеспячэння ва Украіне і цяпер «з дапамогай спецыяльнага хімічнага саставу паралізуюць тыя ўчасткі мозга, якія адказваюць за ідэнтыфікацыю чалавека».

Фармальна «Канвой» — гэта баявы армейскі рэзерв, яго чальцы заключаюць два кантракты — адзін з «Канвоем», другі — з Міністэрствам абароны. Гэта дазваляе мець гарантаваныя выплаты ў выпадку ранення або смерці. Суразмоўца «Важных гісторый» атрымліваў, па яго словах, каля 200 тысяч у месяц (каля 2,6 тысячы даляраў), камандаванне — 300 тысяч (каля 3,9 тысячы даляраў). Акрамя гэтага, тым, хто праслужыць у падраздзяленні год, абяцаюць зямлю «ў Крыме або Абхазіі».

На момант, калі ПВК пачынала фармавацца і туды ўладкаваўся суразмоўца «Важных гісторый», у складзе падраздзялення было каля 300 чалавек.

Сёння пазіцыі «Канвою» знаходзяцца ў суседняй з Крымам Херсонскай вобласці.

Кіраўнік Крыма Сяргей Аксёнаў на пазіцыях «Канвою». Фота: тэлеграм-канал Аксёнава

Як вынікае з рэпартажу тэлеканала ВГТРК, у падраздзялення ёсць цяжкая тэхніка — танкі Т-80 і Т-90 і нават свая радыёэлектронная разведка.

«Па матэрыяльным забеспячэнні наогул ніякіх праблем. Выдалі бронекамізэлькі, каскі, акуляры, пальчаткі, балаклавы, заплечнікі рэйдавыя, увогуле, усё. Тры камплекты рэчаў», — кажа «Важным гісторыям» былы член ПВК.

Трэніровачны палігон «Канвою» знаходзіцца ў вёсцы Перавальнае пад Крымам, што вынікае з інфармацыі, апублікаванай у адным з чатаў, дзе кантактуюць добраахвотнікі. У гэтым крымскім пасёлку ў 80-я гады знаходзіўся 165-ы навучальны цэнтр па падрыхтоўцы замежных вайскоўцаў. Цяпер такая ж назва — у навучальнага цэнтра па падрыхтоўцы снайпераў у Крыме. У складзе «Канвою» ёсць снайперскае падраздзяленне, распавёў яго былы ўдзельнік (на момант, калі ён ваяваў у складзе гэтай ПВК, у падраздзяленні было пяць снайпераў).

Хто такі «Мазай»

Камандзір «Канвою» мае пазыўны «Мазай». У ім можна апазнаць Канстанціна Пікалава — правую руку Прыгожына, куратара ПВК «Вагнер» у Афрыцы.

Канстанцін «Мазай» Пікалаў. Скрыншот відэа «Расія 24»

Упершыню аб «Мазаі» стала вядома пасля сумеснага расследавання выданняў Bellingcat і Insider. Паводле матэрыялу, ён курыраваў прыгожынскіх паліттэхнолагаў на Мадагаскары і ў Цэнтральнаафрыканскай Рэспубліцы. У перапісцы паміж супрацоўнікамі «Мазай» апісваецца як адзіны чалавек у ЦАР, які без страху і на роўных размаўляе з Прыгожыным.

Раней Пікалаў служыў у Мінабароны, у вайсковай часці пад Санкт-Пецярбургам, а пасля выхаду на пенсію стаў саўладальнікам і кіраўніком дэтэктыўнага агенцтва.

Сам кіраўнік Крыма Аксёнаў падтрымлівае Прыгожына і стаў на яго бок у канфлікце з Мінабароны Расіі.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
0
Ёсік/адказаць
24.03.2023
Дзе столькі грошай бяруць на гэтыя ПВК? Кожны пуцінскі патрыёт хоча сабе ПВК.
0
Настрадамус/адказаць
24.03.2023
Готовяться к развалу. Кто может создаёт свои армии, что бы оборонять своё и при возможности оттяпать чужое.
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера
майчэрвеньліпень
ПНАЎСРЧЦПТСБНД
1234
567891011
12131415161718
19202122232425
2627282930