У Польшчы затрымалі яшчэ аднаго расійскага шпіёна. Яго грамадзянства не раскрываецца
Служба вайсковай контрразведкі Польшчы затрымала ў Гданьску замежніка, выставіўшы яму абвінавачанні ў шпіянажы на карысць Расіі. Пра гэта раніцай 27 сакавіка паведаміў партал Onet і іншыя польскія СМІ.
Фота: pixabay
Па інфармацыі пракуратуры горада Гданьска, падазраваны прызнаўся ў працы на расійскія спецслужбы, а таксама падрабязна апісаў абставіны сваёй вярбоўкі і далейшай дзейнасці.
«Следства паказала, што падазраваны дзейнічаў у інтарэсах расійскай разведкі, атрымліваў і збіраў інфармацыю, у тым ліку аб крытычнай інфраструктуры ў Паморскім і Куяўска-Паморскім ваяводствах. Падазроны таксама перадаваў расійскай выведцы звесткі і аб дзейнасці мясцовых службаў і органаў бяспекі», — заявіла прэс-сакратар пракуратуры Гданьска Гражына Ваўрынюк.
Па яе словах, мужчыну схілілі да супрацоўніцтва з расійскімі спецслужбамі, а сваю дзейнасць на карысць Расіі ён пачаў яшчэ з пачатку 2023 года.
У гэты момант мужчына знаходзіцца пад вартай. Калі яго віна будзе даказана, то яму пагражае да 10 гадоў пазбаўлення волі.
Грамадзянства і асоба падазраванага пакуль афіцыйна не раскрываюцца.
У сярэдзіне сакавіка ў Польшчы была знойдзена і ліквідавана, паводле польскай пракуратуры, расійская шпіёнская сетка, якая сачыла за лагістычнымі маршрутамі паставак заходняй зброі Украіне і планавала дыверсіі. У яе склад таксама ўваходзіла трое грамадзян Беларусі.
Чытайце таксама:
Былы ахоўнік пасольства Брытаніі ў Берліне атрымаў 13 гадоў за шпіянаж на карысць Расіі
