Беларуская праваслаўная царква занепакоеная сітуацыяй ва Украіне
Сінод Беларускай праваслаўнай царквы (БПЦ) выдаў заяву, якой выказвае занепакоенасць сітуацыяй, якая склалася ва Украіне. Занепакоенасць выклікала «бягучае становішча спраў кананічнай Праваслаўнай Царквы на тэрыторыі Украіны».
Беларуская Праваслаўная Царква заклікала сусветную супольнасць «актыўна выступіць з абаронай кананічнага праваслаўя на ўкраінскай зямлі як сапраўднай Царквы Хрыстовай, як гаранта міру і закладу стабільнасці ва ўкраінскім грамадстве».
У БПЦ лічаць, што ўкраінскія ўлады павінны прыняць неабходныя меры, накіраваныя «на спыненне дэструктыўных заяў і дзеянняў у дачыненні да Украінскай Праваслаўнай Царквы, яе святароў і вернікаў, уключаючы адмену рашэння аб высяленні насельнікаў Свята-Успенскай Кіева-Пячэрскай лаўры».
«Мы таксама заклікаем улады Украіны забяспечыць няўхільнае выкананне дзейнага ўкраінскага заканадаўства і міжнароднага права ў дачыненні да свабоды сумлення і веравызнанняў, захавання законных правоў і свабод чалавека», — гаворыцца ў заяве БПЦ.
Украінскую праваслаўную царкву Маскоўскага патрыярхату (УПЦ МП) падазраюць у сувязях з Расіяй, а манахі УПЦ МП павінны ўжо заўтра пакінуць Кіева-Пячэрскую лаўру ў Кіеве. Хоць самі прадстаўнікі гэтай Царквы лічаць, што падвяргаюцца несправядліваму пераследу.
25 сакавіка кіраўнік БПЦ мітрапаліт Веніямін разаслаў па ўсіх епархіях Беларускай Праваслаўнай Царквы цыркулярны ліст №1-04/031, у якім заклікаў «у цяперашні няпросты час, калі мы з вамі з'яўляемся сведкамі новых уціскаў, якія здзяйсняюцца ў дачыненні да кананічнай Украінскай Праваслаўнай Царквы, здзейсніць малітоўны подзвіг». Праўда, малітва, якой ён прапанаваў карыстацца, выклікала неадназначную рэакцыю.
Чытайце таксама:
УПЦ Маскоўскага патрыярхату адмаўляецца сыходзіць з Кіева-Пячэрскай лаўры
УПЦ Маскоўскага патрыярхату да канца сакавіка мусіць пакінуць Кіева-Пячэрскую лаўру
