Піраміду Хеопса закрыюць для наведвання
Піраміду Хеопса ў егіпецкай Гізе вырашылі закрыць для наведвання турыстамі. Як паведамляе Міністэрства турызму і старажытнасцяў Егіпта, гэта здарыцца ў чэрвені. Прычына такога рашэння — неабходнасць правядзення рэстаўрацыйных работ у рамках праграмы рэгулярнага абслугоўвання.
Колькі працягнецца рэстаўрацыя самай вялікай егіпецкай піраміды, пакуль не паведамляецца.
Не так даўно навукоўцы выявілі ў пірамідзе Хеопса вялікі калідор: дзевяць метраў у даўжыню і крыху больш за два метры ў шырыню. Выяўленне новага калідора ўжо назвалі «адным з самых важных адкрыццяў, зробленых у пірамідзе Хеопса ў сучасную эпоху». А вось мумію самога фараона дагэтуль не знайшлі.
Піраміда Хеопса размешчаная на плато Гізы на заходнім беразе ракі Ніл недалёка ад Каіра, сталіцы Егіпта. Комплекс складаецца з трох пірамід фараонаў: Хеопса, Хефрэна і Мікерына. Піраміда Хеопса — частка сусветнай спадчыны ЮНЭСКА.
Збудаванне з'явілася прыкладна ў 2560 годзе да нашай эры. На працягу больш чым трох тысячагоддзяў (прыблізна да 1300 года) піраміда была самай высокай пабудовай на зямлі.
Чытайце таксама:
Беларускі турбізнэс сёлета не будзе ў стане задаволіць попыт на выязны турызм
Егіпет — самы папулярны для беларусаў турыстычны маршрут
Пад Асіповічамі стаіць незвычайная піраміда з егіпецкім крыжам наверсе. Для чаго яна?
