Кіраўнік групы — мінскі рэаніматолаг. Што вядома пра беларускіх турыстаў, якіх шукаюць на Эльбрусе 

Аляксей Глазкоў, доктар і альпініст. Скрын відэа СТБ

«Наша Ніва» атрымала пацвярджэнне, што ў склад групы ўваходзіў вядомы беларускі альпініст, анестэзіёлаг-рэаніматолаг Мінскай абласной клінічнай бальніцы Аляксей Глазкоў. За яго плячыма ёсць досвед узыходжанняў на даволі складаныя вяршыні: напрыклад, Глазкоў скарыў пік Хан-Тэнгры вышынёй 7010 метраў. Тады ён правёў у дарозе 33 дні, страціў 10 кілаграмаў і ледзь не загінуў — пад ім абрынуўся шматтонны снежны карніз. Таксама за плячыма Глазкова скарэнне горнага масіва Хібіны, Казбека (5034 метры), піка Леніна (7134 метры).

Глазкоў з’яўляўся ў навінах у 2020 годзе як адзін з медыкаў, які працаваў у чырвонай зоне з хворымі на кавід.

Свае паходы Глазкоў звычайна ладзіў з сябрамі па турыстычным клубе Magadan.by — гэта некамерцыйнае аб’яднанне аматараў актыўнага ладу жыцця. Разам сябры па клубе не толькі скаралі горы, але і плавалі на байдарках, каталіся на лыжах, ладзілі аўта— і велашпацыры.

Разам з Глазковым, як пацвердзілі «Нашай Ніве», на Эльбрус (5642,7 метра) адправіліся наступныя турысты: Аляксей Міхалковіч, Аляксандра Глыбоўская, Вікторыя Уласевіч, Вольга Уласевіч, Дзяніс Уласевіч. Наколькі вядома, досвед горных паходаў быў толькі ў Глазкова.

Па інфармацыі канала сеткі Mash, перад пад'ёмам турысты нідзе не зарэгістраваліся. Спачатку яны нібыта збіраліся ладзіць трэніровачны трэкінг да альпінісцкага лагера Узункол, але потым чамусьці пачалі ўзыходжанне на Эльбрус з боку заходняга схілу. Апошнім беларусаў бачыў кіроўца, які падняўся з імі да вышыні тры тысячы метраў і вярнуўся. З сабой альпіністы ўзялі спадарожнікавы тэлефон, які, як паведамляецца, у першы дзень неасцярожна паклалі ў заплечнік, апарат уключыўся і разрадзіўся.

Эльбрус. Фота: Wikimedia Commons

Па адных даных, трывогу забіў муж адной з турыстак, бо 21 мая група павінна была вярнуцца на базу, але так і не выйшла на сувязь. Таксама ёсць інфармацыя, што пра знікненне беларусаў паведамілі мясцовыя. Вось як пра гэта расказвае дарадца аддзялення беларускага пасольства ў Растове-на-Доне Дзяніс Цімохін: «Яны [беларусы] дамовіліся з мясцовымі, мясцовыя давезлі да нейкага месца. Дамовіліся, што на нейкім іншым пункце іх сустрэнуць праз пэўную колькасць часу. І вось учора быў час, калі яны [беларусы] павінны былі выйсці на гэты пункт, але не выйшлі. Пасля гэтага паднялі ратавальнікаў».

Цяпер альпіністаў шукаюць ратаўнікі з расійскага МНС: удзельнічае больш за 80 чалавек, выкарыстоўваюць верталёт і дрон, але пакуль што слядоў групы Глазкова не знайшлі.

З чатырох схілаў Эльбруса заходні лічыцца самым складаным. Больш папулярна скараць гэтую гару з поўдня ці з поўначы, катэгорыі складанасці гэтых маршрутаў — адпаведна 1Б і 2А. Што да захаду, з гэтага боку на Эльбрус рэкамендуюць узыходзіць толькі больш трэніраваным скалалазам.

Праўда, беларускі альпініст з велізарным досведам, з якім ананімна пагутарыла «Наша Ніва», лічыць, што Эльбрус з усіх бакоў — гэта, хутчэй, пра горны турызм, чым пра альпінізм. «Там усюды трэба, хутчэй, здароўе, чым уменне. Усюды ідзеш пешшу, і ўсюды ёсць небяспека, уласцівая альпінізму, напрыклад, лавіны і расколіны. Пакуль у расколіну не зваліўся, здаецца, і не трэба ведаць, як з яе выбірацца. Чаму ўзыходжанне з захаду самае складанае? Там схіл трохі больш стромкі. Я не хадзіў з захаду, але бачыў гэты схіл зверху, з вяршыні. Сапраўды больш стромкі, але цалкам ходзіцца».

Клуб Magadan.by адмовіўся каментаваць гэтую гісторыю.

Чытайце таксама:

Шэсць беларускіх турыстаў зніклі на Эльбрусе

Турыст з Тулы спрабаваў пакарыць Эльбрус у красоўках і замёрз да смерці

Затрымалі альпініста — за тое, што браў з сабой у замежныя вандроўкі бела-чырвона-белы сцяг

Вера Белацаркоўская

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ

3

4

1

6

14

4