Расія спрабуе вярнуцца ў Раду ААН па правах чалавека — Бі-бі-сі
Расія хоча вярнуць пасаду ў РПЧ ААН і непублічна просіць іншых чальцоў арганізацыі аб падтрымцы. Пра гэта паведамляе Бі-бі-сі, якое атрымала копію аднаго з такіх афіцыйных лістоў ад Масквы.
Плакат супраць прэзідэнта Расіі Уладзіміра Пуціна ў Лондане, 1 сакавіка 2022 года. Фота: AP
Расія была выключаная з Рады ААН па правах чалавека ў красавіку мінулага года пасля пачатку вайны ва Украіне. Аднак цяпер расійскія дыпламаты намагаюцца вярнуць сваё месца ў арганізацыі на новы трохгадовы тэрмін. Да галасавання засталося вельмі мала часу, таму цяпер Расія дасылае лісты чальцам ААН з просьбай аб падтрымцы. Копію такога ліста атрымала і агенцтва Бі-бі-сі.
«У атрыманых дакументах гаворыцца, што Расія абяцае знайсці «адэкватныя рашэнні праблем, звязаных з правамі чалавека», а таксама «не дапусціць ператварэнне РПЧ ААН у інструмент, які служыць палітычнай волі пэўнай групы краін». Расійскія дыпламаты заяўляюць, што спадзяюцца аднавіць міжнародны аўтарытэт краіны пасля шматлікіх абвінавачванняў у парушэнні правоў чалавека», — піша Бі-бі-сі са спасылкай на копію афіцыйнага ліста з Масквы.
Агенцтва нагадвае, што Расію абвінавачваюць у злачынствах як ва Украіне, так і ў межах уласнай тэрыторыі. Апошнія доказы злоўжыванняў былі прадстаўленыя РПЧ у панядзелак у дакладзе Камісіі па расследаванні сітуацыі ва Украіне.
Ёсць вялікая колькасць паведамленняў пра ваенныя злачынствы, сярод якіх катаванні, згвалтаванні і напады на мірных жыхароў ва Украіне. Таксама адзначаецца значна горшая ўнутраная сітуацыя, пры якой любая крытыка вайны ў Расіі вядзе да арышту, катаванняў і жорсткаму абыходжанню, дадае Бі-бі-сі.
Задакументваныя ваенныя злачынствы Расіі ва Украіне супраць цывільнага насельніцтва, Буча, 2022. Фота: AP
Затрыманні на першых антываенных акцыях у Расіі пасля ўварвання ва Украіну. Фота: AP
Але ўсё гэта можа аказацца недастатковым у аргументах супраць Масквы
«Рада ААН па правах чалавека складаецца з 47 чальцоў, кожны з якіх абіраецца раз у тры гады. Галасуюць на выбарах усе 193 члены Генеральнай Асамблеі ААН у Нью-Ёрку.
У гэтым годзе Расія з’яўляецца канкурэнткай Албаніі і Балгарыі, якія таксама прэтэндуюць на 2 месцы, прызначаныя на краіны Цэнтральнай і Усходняй Еўропы. Дыпламаты розных краін заяўляюць, што Расія праводзіць агрэсіўную выбарчую кампанію і прапануе невялікім краінам збожжа, зброю і абарону ад нападкаў Захаду на міжнароднай арэне пры абранні Расіі ў РПЧ. Такім чынам, нельга выключаць таго, што краіна можа вярнуцца ў арганізацыю», — адзначае Бі-бі-сі
У сваіх лістах да чальцоў ААН Расія таксама спрабуе апраўдацца за сваё леташнее адхіленне з РПЧ (тады 93 сябры Генеральнай Асамблеі ААН прагаласавалі «за» адхіленне, 24 былі супраць і 58 устрымаліся). Расійскія дыпламаты вінавацяць у гэтым «ЗША і іх саюзнікаў».
Шэраг праваабарончых арганізацый ужо апублікавалі заяву аб тым, што Расія не падыходзіць для сяброўства ў РПЧ. Яны сцвярджаюць, што гэта было б контрпрадуктыўным і паказала б, што ААН не ставіцца сур’ёзна да прыцягнення Расіі да адказнасці за ваенныя злачынствы ва Украіне. Рашуча супраць такога выступае і Вялікабрытанія.
«Ідэя аб тым, што Расія можа вярнуцца ў Раду правоў чалавека, з'яўляецца абразай самой канцэпцыі правоў чалавека і небяспечным крокам назад, які падарве давер да яе», — кажа Дэвід Лэмі, ценявы міністр замежных спраў Вялікабрытаніі.
Чытайце таксама:
Пасол у Расіі апраўдваўся за вывезеных у Беларусь украінскіх дзяцей
За кулісамі Генасамблеі ААН: вось як Лукашэнка прайграў Славеніі 38:153
