Сотні тысяч палякаў выйшлі на дэманстрацыю апазіцыі
Палякі выйшлі на дэманстрацыю апазыцыі ў Варшаве 1 кастрычніка. Дэманстрацыя адбываецца за два тыдні да парламенцкіх выбараў, піша «Радыё Свабода».
Фота: AP Photo / Czarek Sokolowski
Апытанні грамадскай думкі, якія цытуе Reuters, паказваюць, што кіроўная партыя «Права і Справядлівасць» (ПіС) можа перамагчы на выбарах, але пры гэтым сутыкнуцца з немагчымасцю сфармаваць парламенцкую большасць.
Апазіцыя, найперш ліберальная «Грамадзянская платформа», спадзяецца, што сённяшняя дэманстрацыя актывізуе выбарнікаў. «Надыходзяць вялікія перамены, гэта знак адраджэння Польшчы», — звярнуўся да ўдзельнікаў мітынгу ў цэнтры Варшавы лідар «Грамадзянскай платформы» Дональд Туск.
Паводле Туска, выбары стануць вырашальнымі для правоў жанчын і меншасцяў у Польшчы.
Фота: Радыё Свабода
ПіС знаходзіцца ва ўладзе ад 2015 года і вядзе сваю кампанію, абяцаючы стрымаць прыток мігрантаў у Польшчу і даваць фінансавую падтрымку сем’ям і людзям сталага веку.
Грамадскі тэлеканал TVP, які крытыкі называюць рупарам урада, цытуе паліцыю, якая ацаніла колькасць удзельнікаў сённяшняй дэманстрацыі прыкладна ў 100 тысяч. Паводле Туска, у дэманстрацыі бярэ ўдзел бліжэй да мільёна чалавек. Паводле падлікаў найбуйнейшага польскага інтэрнэт-партала Onet, у маршы ўзялі ўдзел прыблізна 600-800 тысяч чалавек, а даўжыня калоны была каля 4,5 км.
