Беларус з рэкордам выйграў марафонскі заплыў у самым глыбокім каньёне Еўропы
Асаблівасць гэтага заплыву ў тым, што на працягу 20 кіламетраў плыўцам даводзіцца плыць супраць цячэння ракі, і гэта вельмі цяжка.
Леанід Карабейнікаў. Фота з фэйсбука
Беларускі плывец Леанід Карабейнікаў стаў пераможцам марафонскага заплыву SulakRace ў Сулакскім каньёне ў Дагестане, які з'яўляецца самым глыбокім у Еўропе, піша БелТА.
Спартсмен з Оршы праплыў дыстанцыю працягласцю 27 км за 7 гадзін 1 хвіліну і 28 секунд — гэта рэкорд заплыву, які ладзіўся ўжо пяты раз. Асаблівасць гэтага цяжкага заплыву ў тым, што на працягу 20 км плыўцам даводзіцца плыць супраць плыні ракі, і гэта вельмі складана.
На дыстанцыі 11,5 км другім фінішаваў мінчук Аляксандр Маковіч, які паказаў вынік 2 гадзіны 46 хвілін і 50 секунд. Год таму ён быў пераможцам на гэтай дыстанцыі. Гэтым разам першынстваваў Артурас Кантаўскас з Санкт-Пецярбурга. Яшчэ адзін беларускі спартсмен Дзяніс Бында з Мінска заняў трэцяе месца на дыстанцыі 3,6 км (вынік — 1 гадзіна 6 хвілін 56 секунд). Перамог тут Сяргей Калычаў з Самары.
Сулакскі каньён. Фота: Wikimedia Commons
SulakRace уваходзіць у марафонскую серыю Grand Swim Series разам з заплывамі на Байкале (35 км), Ісык-Кулі (45 км), Балхашы (38 км), у Балтыйскім моры недалёка ад Куршскай касы (35 км) і іншымі.
Глыбіня Сулакскага каньёна дасягае 1920 м, гэта на 63 м глыбей за Гранд-Каньён у ЗША і возера Байкал, максімальная глыбіня якога 1642 м.
