У Мінску прайшоў канцэрт Шалкевіча
Асабліва бурную рэакцыю ў залі выклікала новая песня пра цыганоў і Славянскі базар, якая мае ўсе шансы паўтарыць шалёны поспех Таварыша Сапегі.
Вечарам 11 снежня ў ДК Ветэранаў было шматлюдна. Канцэртная зала запоўнілася цалкам. І не толькі моладдзю, як тое бывае падчас выступаў рок-гуртоў. Адчувалася, што Віктар Шалкевіч мае свайго сталага слухача сярод прадстаўнікоў розных пакаленняў – ад малога да старога.
І чаканні гэтай разнастайнай публікі цалкам апраўдаліся. Шалкевіч спяваў пра Валожын і Магілёў, пра няўдалае каханне да жанчыны-алкагалічкі і пра палітэмігранта ў Швецыі, які не хоча вяртацца дадому.
Асабліва бурную рэакцыю ў залі выклікала новая песня пра цыганоў і Славянскі базар, якая мае ўсе шансы паўтарыць шалёны поспех Таварыша Сапегі.
Сканчаўся амаль дзвюхгадзінны выступ «Кароткай гісторыяй Беларусі». Публіка развітвалася са спеваком стоячы. А ён абяцаў прыехаць ізноў. У сакавіку 2010 года Віктар Шалкевіч прэзентуе новы альбом.