Знайсці
10.02.2024 / 19:23РусŁacБел

Былы прэм'ер Нідэрландаў і ягоная жонка пайшлі з жыцця ў адзін дзень. Яны пагадзіліся на эўтаназію

Былы прэм'ер-міністр Нідэрландаў Дрыс ван Агт і ягоная жонка пагадзіліся на эўтаназію і пайшлі з жыцця ў панядзелак, 5 лютага. Ім было па 93 гады, і яны разам выхавалі траіх дзяцей, паведаміла 9 лютага праваабарончая арганізацыя Forum Praw, заснаваная ў свой час ван Агтам.

Арганізацыя паведаміла, што былы нідэрландскі прэм'ер-міністр і ягоная жонка памерлі 5 лютага і будуць пахаваныя пасля прыватнай цырымоніі ў Неймегене на ўсходзе Нідэрландаў.

«Ён памёр разам са сваёй каханай жонкай Яўгеніяй ван Агт-Крэкельберг, апорай і павадыркай, з якой ён быў больш за 70 гадоў і якую заўсёды называў «мая дзяўчынка», — гаворыцца ў паведамленні.

Некаторы час пара змагалася з моцнымі праблемамі са здароўем. Былы прэм'ер-міністр перанёс у 2019 годзе кровазліццё ў мозг падчас выступу на цырымоніі, прысвечанай палесцінскай праблеме. У палесцінскім пытанні ён стаяў на баку палесцінцаў, крытыкаваў улады Нідэрландаў за «праізраільскую пазіцыю» і выказваў шкадаванне ў сувязі з байкотам арганізацыі ХАМАС. 

З часоў таго інсульту палітык цалкам так і не ачуняў.

Ван Агт быў прэм'ер-міністрам Нідэрландаў з 1977 па 1982 год. Ён быў звязаны з рухам хрысціянскіх дэмакратаў, вядомы сваёй маляўнічай мовай, якую ён часта ўзбагачаў архаічнымі фразамі.

«Сваёй квяцістай і ўнікальнай мовай, яснымі перакананнямі і яркім знешнім выглядам Дрыс ван Агт надаў колер і змест нідэрландскай палітыцы ў часы палярызацыі», — заявіў цяперашні прэм'ер-міністр Нідэрландаў Марк Рутэ.

Магчымасць эўтаназіі ў Нідэрландах была заканадаўча замацаваная ў 2001 годзе. Чалавек мусіць праінфармаваць пра сваё жаданне лекара, затым камісія па этыцы дае сваё заключэнне. У выпадку яе адмовы дазвол могуць даць пракурор і камісія ад Міністэрства аховы здароўя, дабрабыту і спорту. Пры гэтым саму эўтаназію праводзіць лекар, у якога ёсць права ад гэтага адмовіцца.

Чытайце таксама:

Яшчэ адна краіна вырашыла легалізаваць эўтаназію

Навукоўцы: эўтаназія, магчыма, існавала ў імперыі інкаў

Дзіцячая эўтаназія — што паказвае досвед Бельгіі ў гэтай сферы і чаму гэта важна

Урад Нідэрландаў ухваліў магчымасць эўтаназіі для дзяцей

У Швейцарыі беларусцы далі штраф за адмову ўсыпіць сабаку

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
16
Панылы сорам
7
Ха-ха
1
Ого
5
Сумна
24
Абуральна
7
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера
ПНАЎСРЧЦПТСБНД
12345
6789101112
13141516171819
20212223242526
2728293031