Знайсці
26.02.2024 / 10:573РусŁacБел

Айцішнік купіў кватэру ў бабулі, але засяліцца адразу не змог. Яна прадала яе тэлефонным аферыстам

Дзмітрый робіць рамонт у новай кватэры. Радасці на твары мала. Купіў нерухомасць у бабулі яшчэ паўгода таму і змог засяліцца толькі паводле рашэння суда — з цяжкасцю адбіў гэта права, піша Tochka.by.

Сумнае наваселле

Дзмітрый працуе ў сферы IT, але не ўсе там суперзоркі. Хлопец жыў з маладой жонкай на здымнай кватэры. Нешта сабраў, нешта пазычыў у бацькоў — хапіла на куплю сціплай «аднапакаёўкі». Раён нагледзелі каля станцыі метро «Пушкінская».

«Лакацыя для нас зручная, кватэра не «забітая». Мілая бабуля сустрэла. І яшчэ скінула пару тысяч за тэрміновасць», — пачынае аповед Дзмітрый.

Выдатна, усе задаволеныя. Ударылі па руках. Здзелку правялі праз агенцтва. У сярэдзіне мінулага чэрвеня падпісалі дамову куплі-продажу.

Дзмітрый стаў паўнапраўным гаспадаром. Бабулька павінна была выселіцца на працягу тыдня, але гэтага не здарылася.

«Я застаюся, я буду тут жыць!»

Галіна Ленінаўна адмовілася выязджаць. Аказалася, ёй няма куды ісці. У прысутнасці новых уладальнікаў і рыэлтара распавяла, як яе падманулі ашуканцы.

«Жонка ў істэрыцы, у мяне акругліліся вочы», — нервова ўсміхаецца і цяжка ўздыхае хлопец.

Рыэлтар растлумачыў бабульцы: маўляў, прабачце, але вы кватэру прадалі, незаконна ў ёй знаходзіцеся. Прапаноўвалі дапамогу, каб знайсці арэнднае жыллё, але ў жанчыны ўжо не засталося ні рубля.

Галіна Ленінаўна памяняла замкі і засталася дома. Сілай яе адтуль было не дастаць, напісала заяву на правядзенне пракурорскай праверкі.

Грошай больш няма

Ашуканцы тэлефанавалі бабулі са схаванага нумара. Прадставіліся людзьмі ў пагонах. Патэлефанавалі менавіта ў той момант, калі рахункі ў банку сталі адзыўнымі.

Пераканалі даверлівую жанчыну, што на яе ўзяты велізарны крэдыт. Паверыла і перавяла грошы нібыта на бяспечны рахунак. Таксама сказалі, што кватэра ў базе «чорных рыэлтараў». Трэба яе прадаць і па старой схеме грошы зноў пакласці на бяспечны рахунак.

Незнаёмцы абяцалі вывесці «чорных рыэлтараў» на чыстую ваду. Толькі вось вывелі не рыэлтараў, а грошы.

У банку толькі на апошнім траншы заўважылі падазроныя рухі сродкаў. Прыйшлі з міліцыі — ужо сапраўднай.

Сустрэліся ў судзе

Надышлі суды. Чатыры эпізоды. Лінія абароны мела намер адмяніць дамову куплі-продажу, нібыта бабулька была ўведзена ў зман.

Апошні суд быў у студзені 2024 года. Расплачвацца за чужыя памылкі Дзмітрыю не давялося. А мог бы трапіць у вялікую непрыемнасць — адказчыца кампенсавала б суму гадамі з маленечкай пенсіі.

Суд вынес рашэнне: Галіна Ленінаўна павінна пакінуць ужо не сваё жыллё. Жанчына адказна аплаціла перад выездам «камуналку», судовыя выдаткі і пакінула былыя родныя сцены.

Галіна Ленінаўна цяпер туліцца ў інтэрнаце ў маленечкім пакоі. У абшарпаным калідоры стаіць прагорклы пах ежы і цыгарэт. Ванная — на чатыры пакоі. Пральныя машыны — на агульнай кухні.

Абжываецца, валізкі яшчэ не разабрала. У 71 год — жыццё з чыстага ліста.

«Я ўжо сваё аплакала», — прызнаецца пажылая жанчына.

У мінулым яна працавала ў бібліятэцы, а яшчэ санітаркай. І вось на старасці гадоў вымушана зноў быць сядзелкай — па восем гадзін у дзень. Успамінае размову з ашуканцамі.

«Хацела пакласці слухаўку — ён ускрыкнуў, і ў мяне ў галаве нешта замкнулася», — распавядае Галіна Ленінаўна.

— Вас не збянтэжыла абсурднасць схемы: каб «чорныя рыэлтары» не прадалі кватэру, трэба яе прадаць — гэта ж аксюмарон.

— Ні пра што тады не думала. Была як пад гіпнозам. Я ім аддала ўсё. І да апошняга верыла, што дапамагаю. Апрацоўка ішла кожны дзень.

Махляр тэлефанаваў даверлівай бабульцы літаральна штодня на працягу месяца. Далікатна цікавіўся, як пажывае. Загадаў нікому не казаць пра іх справы, трымаць сакрэтнасць.

Са слоў Галіны Ленінаўны, і інструкцыю далі: падчас продажу кватэры Дзмітрыю распавядала, што з'язджае ў Расію — нібыта там радня, а тут нікога.

Пасля вываду грошай ад продажу ашуканцы тэлефанавалі, патрабавалі яшчэ, крычалі ў трубку. Ніякай далікатнасці. Вось тады гіпноз скончыўся.

«Узнікла пачуццё жаху ад усяго таго, што адбылося», — кажа яна.

Ашуканцы забралі ўсё, што было нажыта пажылой жанчынай: пару дзясяткаў тысяч рублёў, столькі ж зберажэнняў у валюце і яшчэ ўсе грошы ад продажу кватэры.

Галіна Ленінаўна перакананая, што ў гэтай гісторыі пацярпела толькі яна.

— Вам па-чалавечы не шкада было Дзмітрыя?

— Не шкада. Вы ведаеце, як добра ён зарабляе, — строга адказала Галіна Ленінаўна.

Выхад для пажылой жанчыны — з'ехаць да сына. Ён жыве ў Нямеччыне.

Чытайце таксама:

65-гадовая пенсіянерка пералічыла махлярам 15 тысяч рублёў. А не трэба было верыць фэйкаваму Азаронку

На мінчука махляры аформілі два анлайн-крэдыты. Ён пайшоў у суд і перамог

Махляры сталі падманваць беларусаў праз дактароў

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
3
Панылы сорам
41
Ха-ха
4
Ого
2
Сумна
15
Абуральна
7
1
Алька /адказаць/
26.02.2024
Як данат 7$, то міліцыя знойдзе, а як куды пайшлі дзясяткі тысяч ад бабулькі да махляроў - то праблема. Не веру, што немагчыма прасачыць рух сродкаў па рахунку ў Беларусі. У доле ўсе гэтыя губазікі, самі крышуюць і рэальна не хлусілі, калі казалі, што з органаў тэлефануюць
8
Шерхан/адказаць/
26.02.2024
Не было там никаких мошенников.Бабка просто решила пацана на хату кинуть
0
Проста жыхар/адказаць/
28.02.2024
— Не шкада. Вы ведаеце, як добра ён зарабляе, — строга адказала Галіна Ленінаўна.
Вось пасля гэтых словаў я перастаў яе шкадаваць. Дурная бабка.
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера
сакавіккрасавікмай
ПНАЎСРЧЦПТСБНД
1234567
891011121314
15161718192021
22232425262728
2930