Чат турбалукашэнкаўцаў прызналі экстрэмісцкім
Яны крытыкуюць чыноўнікаў і адміністрацыю Лукашэнкі. Даходзіць да крамольных выслоўяў. Распавядаем, што гэта за чат.
Скрыншот са спісу экстрэмісцкіх матэрыялаў
Сёння стала вядома, што чат, прывязаны да каналу «Белы трусік», які вядуць радыкальныя прыхільнікі Лукашэнкі, прызналі экстрэмісцкім.
«Белы трусік» — канал прыхільнікаў блогераў Бондаравай, Сідаровіч і Уварава. Адміністрацыя канала шукае «змагароў» сярод дзяржаўных функцыянераў Беларусі. Іх яны называюць «сутулымі» і «суполкай». У розны час яны запісвалі ў «крыптазмагароў» супрацоўнікаў адміністрацыі Лукашэнкі, прапагандыстаў, чыноўнікаў і іншых дзеячаў. У тым ліку нават Мукавозчыка.
Скрыншот з канала «Белы трусік»
Агулам іхнія погляды зводзяцца да таго, што мудры і моцны лідар — Лукашэнка — аточаны знешнімі і ўнутранымі ворагамі, якія ўціхую мараць пра прыход Ціханоўскай да ўлады. Праз гэта «ворагі» ставяць сваіх людзей паўсюль, нават у крамы цацак, дзе прадаюць «няправільныя цацкі з вясёлкай, якай прапагандуе ЛГБТ».
Сярод «поспехаў» суполкі — стварэнне праблемаў тыкток-блогеру Дзім Дзімычу, якога адвольна вінавацілі ў ЛГБТ-прапагандзе і адмена выступу Сакурава ў Мінску.
Нагодай запісаць чалавека ў «змагары» можа стаць, напрыклад, дазвол на «няправільную» мастацкую выставу (погляды на мастацтва ў іх увогуле вельмі спецыфічныя) або канцэрт. Ці проста крытыка канала або некага з куміраў адміністрацыі, напрыклад, Бондаравай — за гэта прапагандыста Канстанціна Прыдыбайлу і запісалі ў геі.
Скрыншот з каналу «Белы трусік»
Звычайна прызнанне чата канала экстрэмісцкім выкарыстоўваецца як «папераджальны стрэл». Таксама гэта можа значыць, што некага з удзельнікаў чата асудзілі за «экстрэмізм».
Так было з блогерам Аляксеем Голікавым — пакуль ён толькі хваліў Лукашэнку і цкаваў яго апанентаў, усё ў яго было добра. Яму нават даверылі весці перадачу на СТБ.
Але калі ён разам са сваім сябрам Міхаілам Сідарэнкам, які працаваў у брэсцкім аўтапарку, пачаў крытыкаваць чыноўнікаў, то чат ягонага канала прызналі экстрэмісцкім, а Сідарэнку асудзілі на суткі. Пра Голікава некаторыя прапагандысты пачалі казаць, што ён «ідзе шляхам Ціханоўскага». У выніку аднаго з каментатараў чата асудзілі за «абразу Лукашэнкі» — ён назваў таго «балаболам».
Самога Голікава змусілі прыціхнуць.
«Наша Нiва» — бастыён беларушчыны
ПАДТРЫМАЦЬЧытайце таксама:
«Мегатоп» зняў рэкламу, дзе мужчына ў ружовым парадзіруе Кэры Брэдшоу. І нарваўся на ГУБАЗіК
