Знайсці
25.04.2024 / 11:323РусŁacБел

Сікорскі: Лукашэнка павінен даказаць самастойнасць, каб весці палітыку паміж Расіяй і Захадам

«Сёння мы страцілі надзеі», — канстатуе міністр замежных спраў Польшчы.

Фота: Канцылярыя прэм'ер-міністра Польшчы

Калі Аляксандр Лукашэнка хоча весці палітыку паміж Захадам і Расіяй, ён павінен даказаць сваю самастойнасць. Пра гэта заявіў міністр замежных спраў Польшчы Радаслаў Сікорскі, выступаючы з дакладам аб замежнай палітыцы ўрада ў Сейме, піша Reform.news.

Паводле яго слоў, паступовая васалізацыя Беларусі Расіяй прывяла да таго, што блізкая для Польшчы краіна разглядаецца ў катэгорыях пагроз.

«На жаль, паступовая васалізацыя Беларусі Расіяй прыводзіць да таго, што таксама гэтую краіну перш за ўсё павінны разглядаць у катэгорыях пагроз для бяспекі. Працягваецца больш за тры гады палітычны крызіс, парушэнне правоў чалавека, беспрэцэдэнтныя рэпрэсіі, падтрымка расейскай агрэсіі супраць Украіны, правакаванне міграцыйнага крызісу — усё гэта ўяўляе сур'ёзныя пагрозы для цэлага рэгіёну. Перажываем за сітуацыю ў краіне, з якой нас аб'ядноўваюць стагоддзі сумеснай гісторыі і моцныя культурныя сувязі», — сказаў міністр.

Ён падкрэсліў, што асаблівую занепакоенасць польскага боку выклікае становішча польскай меншасці ў Беларусі. Сікорскі таксама адзначыў, што раней Варшава першай прапаноўвала дыялог Мінску, але цяпер яна расчаравалася ў беларускім баку.

«Асаблівую занепакоенасць выклікае становішча польскай меншасці, якая стала закладнікам рэжыму. Беларускія ўлады нясуць поўную адказнасць за найгоршы ў гісторыі стан двухбаковых адносін. У мінулым усе польскія ўрады першымі давалі імпульс для дыялогу. Сёння мы страцілі надзеі.

Умовай вяртання [адносін на ранейшы ўзровень] з'яўляюцца змены з беларускага боку. Калі Аляксандр Лукашэнка хоча вярнуць прастору для правядзення палітыкі паміж Расеяй і Захадам, павінен у першую чаргу паказаць, што мае хоць нейкую самастойнасць», — сказаў Сікорскі.

Ён пацвердзіў, што польскі ўрад працягне дамагацца вызвалення Анджэя Пачобута і падтрымліваць беларускія дэмсілы.

«У сакавіку споўнілася тры гады, а ў лютым прайшоў год ад скандальнага асуджэння Андрэя Пачобута на 8 гадоў зняволення. Паслядоўна дамагаемся яго вызвалення. Будзем падтрымліваць беларускія грамадзянскія арганізацыі і супрацоўнічаць з дэмакратычнай апазіцыяй», — дадаў ён.

Сікорскі падкрэсліў, што МЗС працягне падтрымліваць СМІ і фінансаваць тэлеканалы, якія вядуць вяшчанне на беларускай і рускай мовах.

«Неабходнай умовай барацьбы з прапагандай рэжымаў у Маскве і Мінску з'яўляецца доступ да расійскіх і беларускіх грамадзян, а шырэй — да гледача ва ўсім свеце, з дакладнай інфармацыяй. Мой адказ на тыраду расійскага пасла ў Радзе Бяспекі ААН паказвае, што можна супрацьстаяць расейскай хлусні. Будзем рабіць гэта, незалежна ад таго, ці з'яўляюцца яе аўтарамі расейскі амбасадар, былы прэзідэнт, сённяшні кіраўнік або легіёны інтэрнэт-троляў, карысных ідыётаў і платных агентаў.

Інструментам барацьбы з дэзінфармацыяй, а таксама папулярызацыі ведаў аб польскай гісторыі і дыпламатыі будуць таксама тэлеканалы, якія фінансуюцца з бюджэтных сродкаў, што перадаюцца праз МЗС: сэрвісы TVP World, якія вяшчаюць на англійскай, нямецкай, беларускай і рускай мовах», — сказаў міністр.

Да гэтага, кажучы пра вайну Расіі супраць Украіны, Сікорскі выказаўся за сінхранізацыю санкцый супраць РФ і Беларусі.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
11
Панылы сорам
1
Ха-ха
2
Ого
0
Сумна
0
Абуральна
1
3
Разумнік/адказаць/
25.04.2024
Ані слова пра Белсат ці іншыя беларускія медыя. 
1
Майце сумленне/адказаць/
25.04.2024
Разумнік, Вам ужо і польская дзяржава нешта павінна? 
25.04.2024
Майце сумленне, яна павінна дбаць пра Сувалкскі калідор. Украіна ўжо дружыла...і атрымала Бучу
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера